Кіраўнік МЗС Ірана наведае Беларусь

7 снежня, Позірк. Міністр замежных спраў Ірана Абас Арагчы найбліжэйшым часам зробіць візіты ў Маскву і Мінск, дзе плануе правесці перамовы з уладамі РФ і Беларусі.

Пра гэта на прэс-канферэнцыі паведаміў прадстаўнік МЗС Ірана Эсмаіл Багаі.

“На ўзроўні Міністэрства замежных спраў на наступным тыдні будуць сустрэчы на высокім узроўні ў Беларусі і Расіі. Арагчы здзейсніць візіт у гэтыя дзве краіны ў рамках пастаянных кансультацый”, — перадае словы Багаі ТАСС.

Паводле слоў Багаі, прэзідэнт Ірана Масуд Пезешкіян у сваю чаргу ў бліжэйшыя дні наведае Казахстан і Туркменістан.

20 жніўня ў Мінску адбылася сустрэча Аляксандра Лукашэнкі з Пезешкіянам. Лукашэнка заявіў пра гатоўнасць да супрацоўніцтва з Іранам у розных сферах — ад “забеспячэння харчаваннем” да “вайскова-тэхнічнага супрацоўніцтва”.

Па выніках перамоў было падпісана 13 дакументаў.