За мінулыя суткі ахвярамі пажараў стала пяць чалавек

8 снежня, Позірк. Пяць чалавек стала ахвярамі пажараў, што адбыліся ў Беларусі з 6:00 7 снежня да 6:00 8 снежня, вынікае з аператыўнай зводкі Міністэрства па надзвычайных сітуацыях.

У Мінску сямейная пара загінула падчас пажару ў трохпакаёвай кватэры на вул. Цікоцкага, дзе, паводле звестак гарадскога ўпраўлення МНС, загарэўся ложак.

Жанчына 1966 года нараджэння не перажыла пажар у жылым доме па вул. Грыбаедава ў Рэчыцы (Гомельская вобласць). Разглядаецца версія, згодна з якой узгаранне ўзнікла праз неасцярожнае абыходжанне з агнём пры курэнні.

У Гродзенскай вобласці паведамляецца пра двух загінулых — у Шчучынскім раёне.

Ад пачатку года, паводле даных МНС, ахвярамі пажараў у Беларусі стала 487 чалавек (год таму на гэтую ж дату — 493, зніжэнне на 1,2%); траўмавана — 565 (561, +0,7%); выратавана — 862 (917, -4,9%). Пры гэтым колькасць пажараў узрасла на 3,1% — з 5.762 да 5.939.

“Позiрк” неаднаразова звяртаў увагу на тое, што МНС перыядычна карэктуе статыстыку смяротнасці на пажарах у бок памяншэння (папярэдні выпадак — 5 кастрычніка).

Згодна з тлумачэннем ведамства, часам пасля правядзення судова-медыцынскай экспертызы высвятляецца, што смерць адбылася не праз пажар. Наадварот, як заявіла МНС, узгаранне часам можа ўзнікнуць пасля таго, як чалавек памёр.