Ад пачатку снежня ў Беларусь на падставе бязвізу ўехала 3.396 грамадзян еўрапейскіх краін

8 снежня, Позірк. З 1 па 8 снежня ў бязвізавым парадку ў Беларусь уехала 3.396 грамадзян еўрапейскіх дзяржаў (тыднем раней — 3.216), сведчыць праведзены “Позіркам” аналіз даных Дзяржаўнага пагранічнага камітэта.

Гэта больш, чым было ў іншыя тыднёвыя перыяды на працягу лістапада, але ўсё яшчэ саступае ўзроўню кастрычніка, калі да закрыцця Літвой пагранпераходаў на мяжы з Беларуссю колькасць візіцёраў складала амаль 4,5 тыс. на тыдзень.

За апошні тыдзень у Беларусь прыбыў 1.091 грамадзянін Літвы (1.088 тыднем раней), 996 грамадзян і неграмадзян Латвіі (899), 899 грамадзян Польшчы (874), 410 грамадзян іншых еўрапейскіх дзяржаў са спісу пашыранага бязвізу (377).

Агулам з 15 красавіка 2022 года Беларусь наведалі 1.242.466 жыхароў Еўропы. З Латвіі прыбылі 399.582 замежнікаў, Літвы — 658.321, Польшчы — 129.829. У рамках пашыранага бязвіза, уведзенага для 35 еўрапейскіх дзяржаў з 19 ліпеня 2024 года, у Беларусь уехалі 54.734 замежныя грамадзяніны.

Бязвізавы рэжым дзейнічае з 15 красавіка 2022 года для жыхароў Латвіі і Літвы, з 1 ліпеня таго ж года — Польшчы. 19 ліпеня 2024 года беларускія ўлады распаўсюдзілі бязвізавы рэжым на грамадзян яшчэ 35 краін Еўропы.

Гаворка пра жыхароў Аўстрыі, Андоры, Бельгіі, Балгарыі, Босніі і Герцагавіны, Ватыкана, Вялікабрытаніі, Венгрыі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Ліхтэнштэйна, Люксембурга, Мальты, Манака, Нідэрландаў, Нарвегіі, Партугаліі, Румыніі, Сан-Марына, Паўночнай Македоніі, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі. Большасць гэтых краін рэжым Лукашэнкі лічыць “недружалюбнымі” за тое, што ўвялі санкцыі альбо далучыліся да іх.

Бязвіз для жыхароў 38 еўрапейскіх краін дзейнічае да канца 2025-га, аднак, хутчэй за ўсё, будзе падоўжаны, як гэта ўжо адбывалася.