Лукашэнка спадзяецца на сумесныя праекты з Танзаніяй, дзе пятая частка насельніцтва недаядае

9 снежня, Позірк. Надзею на тое, што Беларусь і Танзанія “ў бліжэйшы час выйдуць на сумесныя праекты па забеспячэнні харчовай бяспекі, механізацыі сельскай гаспадаркі, а таксама ў адукацыйнай, навукова-тэхнічнай і іншых сферах“ выказаў Аляксандр Лукашэнка, віншуючы прэзідэнта гэтай краіны Самію Сулуху Хасан з Днём незалежнасці.

Як паведаміла прэс-служба віншавальніка, ён лічыць, што вынікі кантактаў паміж урадамі Беларусі і Танзаніі ў 2025 годзе “надалі сур’ёзны імпульс для далейшага нарошчвання ўзаемнага гандлю і пашырэння сувязяў па ўсіх напрамках“.

22 ліпеня прэм’ер-міністр Аляксандр Турчын на сустрэчы ў Мінску прапанаваў танзанійскаму калегу Касіму Маджаліве “зрабіць унёсак у забеспячэнне харчовай бяспекі“ ўсходнеафрыканскай краіны і даць ёй адаптаваную сельгастэхніку. Турчын заявіў, што Мінск разглядае Танзанію як “важнага партнёра ва Усходняй Афрыцы“ і гатовы падтрымліваць краіну “ў яе імкненні да эканамічнага развіцця і росквіту”.

Паводле яго слоў, ёсць перспектывы для пашырэння ўзаемадзеяння ў машынабудаванні, нафтахіміі, медыцыне і турызме.

“Мы гатовыя дзяліцца ведамі, тэхналогіямі, кампетэнцыямі, забяспечыць сервіснае суправаджэнне і навучанне тэхнічнага персаналу, працаваць над рэалізацыяй сумесных праграм і праектаў. Наша прапанова заснаваная на ўжо наяўным досведзе рэалізацыі праграм механізацыі сельскай гаспадаркі ў Зімбабве і Нігерыі. У іншых краінах Афрыкі таксама добра ведаюць нашу тэхніку“, — сказаў Турчын.

“У свеце шырока вядомыя нашы дасягненні ў транспланталогіі, кардыялогіі, анкалогіі, рэабілітацыі, ахове мацярынства і дзяцінства“, — заявіў ён.

Прэм’ер Танзаніі, у сваю чаргу, паведаміў, што ўрад гатовы садзейнічаць беларускаму бізнесу для выхаду на рынак краіны: “Нам цікавая сфера аховы здароўя, развіццё дыпламатычнага ўзаемадзеяння, а таксама эканамічная сфера. Паміж намі быў падпісаны шэраг двухбаковых пагадненняў, якія ствараюць перадумовы для развіцця кааперацыі“.

Па выніках сустрэчы, як паведамлялі дзяржСМІ, быў падпісаны шэраг пагадненняў “у дыпламатычнай, сельскагаспадарчай і адукацыйнай сферах“.

Лукашэнка, віншуючы прэзідэнта Танзаніі год таму, заяўляў, што Беларусь гатовая стаць для гэтай краіны “надзейным партнёрам у ажыццяўленні самых амбіцыйных планаў па развіцці ўласнай эканомікі“.

Дыпламатычныя стасункі паміж Беларуссю і Танзаніяй устаноўленыя ў траўні 1996 года.

Раней на сайце амбасады Беларусі ў Кеніі, якая курыруе Танзанію, паведамлялася, што ўзаемны тавараабарот у 2021 годзе склаў 8,85 млн долараў (беларускі экспарт — 4,01 млн, танзанійскі — 4,84 млн). Мінск пастаўляў Дадоме ў асноўным калійныя ўгнаенні, нафтапрадукты, вымяральнае абсталяванне, у зваротным кірунку ішлі садавіна, гародніна, арэхі, кветкі і інш.

Цяпер звестак аб двухбаковым гандлі ў адкрытым доступе няма, аднак на сайце замежнай установы адзначаецца, што “паводле вынікаў прэзідэнцкіх выбараў 2025 года, якія прайшлі ў Беларусі, атрымана віншаванне з перамогай на адрас А.Р. Лукашэнкі ад прэзідэнта Танзаніі С. Хасан“.

Паводле справаздачы Global Hunger Index (Глабальны індэкс голаду) за 2025 год, 21,1% насельніцтва Танзаніі пакутуе на недаяданне (у 2024 годзе было 23,8%). Краіна ў гэтым рэйтынгу займае 91-е месца сярод 123 краін (было 94-е сярод 127).

Таксама ў дзяржаве нізкая сярэдняя працягласць жыцця і высокая дзіцячая смяротнасць, распаўсюджаныя ВІЧ і малярыя.