Пошта Чэхіі патлумачыла спыненне працы з Беларуссю недахопам транспарту і абмежаваннем міжнародных перавозак

12 снежня, Позірк. Пошта Чэхіі патлумачыла спыненне працы з Беларуссю недахопам транспартных магутнасцяў і абмежаваннем міжнародных перавозак, паведаміла кіраўнік Офіса дэмакратычных сілаў Беларусі ў Чэхіі Крысціна Шыянок.

Такі адказ офіс атрымаў на свой запыт у паштовую службу краіны. У паведамленні адзначаецца, што аднаўленне прыёму адпраўленняў стане магчымым, калі ўдасца забяспечыць стабільныя транспартныя магутнасці, якія дадуць магчымасць нанава настроіць стандартны абмен адпраўленнямі.

Чэшская пошта спыніла прыём пасылак, лістоў і паштовак у Беларусь з 1 снежня.

Чэхія — адзіная краіна Еўрапейскага саюза, якая не выдае на агульных падставах грамадзянам Беларусі шэнгенскія візы пасля пачатку поўнамаштабнай вайны Расіі супраць Украіны ў лютым 2022 года.