Наўседа на сустрэчы з Бяляцкім: Літва заўсёды будзе падтрымліваць намаганні ЗША па вызваленні палітвязняў у Беларусі

15 снежня, Позірк. Літва “заўсёды падтрымлівала і будзе падтрымліваць” намаганні ЗША па вызваленні ўсіх палітычных зняволеных у Беларусі, заявіў прэзідэнт гэтай балтыйскай краіны Гітанас Наўседа 15 снежня падчас сустрэчы з праваабаронцам, лаўрэатам Нобелеўскай прэміі міру Алесем Бяляцкім.

“З вялікай палёгкай мы ўспрынялі вестку, што пасля доўгіх гадоў несправядлівага зняволення вы нарэшце вольныя. Ваша вытрымка, маральная сіла і непахісная прыхільнасць чалавечай годнасці — нават у самыя змрочныя гадзіны — натхняюць нас усіх”, — цытуе Наўседу яго прэс-служба.

Паводле слоў літоўскага прэзідэнта, беларускі рэжым “павінен спыніць усе палітычныя рэпрэсіі і не пачынаць новыя”. Паводле яго сцвярджэння, у Беларусі “павінны быць праведзеныя дэмакратычныя, свабодныя і сумленныя выбары”, а таксама “павінна быць спыненая любая падтрымка рэжымам Лукашэнкі агрэсіўнай вайны Расіі супраць Украіны”.

Наўседа таксама адзначыў, што, ажыццяўляючы чарговую гібрыдную атаку супраць Літвы з дапамогай метэаралагічных шароў, Лукашэнка “імкнецца вырвацца з міжнароднай ізаляцыі, здабыць легітымнасць і пазбегнуць санкцый”.

Літва “не паддасца шантажу рэжыму і будзе працягваць рашуча падтрымліваць дэмакратычную апазіцыю Беларусі”, заявіў Наўседа.

У сустрэчы прыняла ўдзел дэмакратычны лідар Святлана Ціханоўская.

13 снежня 2025 года ў рамках дамоўленасцяў паміж Мінскам і Вашынгтонам Лукашэнка вызваліў 123 чалавекі (110 грамадзян Беларусі і 13 замежнікаў) з умовай іх наступнага ад’езду з краіны. 109 беларусаў і 5 украінцаў прыбылі на тэрыторыю Украіны праз пункты пропуску Новая Гута / Новыя Ярылавічы, праз якія Украіна і Расія звычайна праводзяць абмен палоннымі.

Кіраўнік праваабарончага цэнтра “Вясна” Алесь Бяляцкі (лаўрэат Нобелеўскай прэміі міру 2022 года), яго намеснік і віцэ-прэзідэнт Міжнароднай федэрацыі за правы чалавека (FIDH) Валянцін Стэфановіч і каардынатар кампаніі “Праваабаронцы за свабодныя выбары” Уладзімір Лабковіч былі затрыманыя 14 ліпеня 2021 года. 3 сакавіка 2023 года ў рамках палітычна матываванай справы аб “кантрабандзе грошай” і “фінансаванні парушэння грамадскага парадку” яны былі прысуджаныя да 10, 9 і 7 гадоў зняволення адпаведна.

Бяляцкі і Лабковіч былі вызваленыя 13 снежня, Лабковіч адпраўлены ва Украіну, Бяляцкі — вывезены ў Літву.