Права падпісаць пагадненне з Іарданіяй аб ліквідацыі двайнога падаткаабкладання перадэлегаванае МЗС

16 снежня, Позірк. Міністэрства замежных спраў упаўнаважанае падпісаць пагадненне з Іарданіяй “аб ліквідацыі двайнога падаткаабкладання адносна падаткаў на даходы і прадухіленні ўхілення ад выплаты падаткаў і мінімізацыі падатковых абавязацельстваў”, сведчыць указ № 433 ад 15 снежня.

Дакумент, апублікаваны 16 снежня на Нацыянальным прававым інтэрнэт-партале, уносіць змены ва ўказ № 53 ад 10 лютага 2025 года, якім Аляксандр Лукашэнка ўхваліў праект згаданага пагаднення ў якасці асновы, а таксама ўпаўнаважыў Міністэрства па падатках і зборах правесці перагаворы і падпісаць міжнародны дакумент. Новы ўказ перадае права на подпіс ад МПЗ да МЗС.

Указам № 210 ад 22 траўня 2024 года Лукашэнка ўхваліў праект міжурадавага пагаднення з Іарданіяй аб скасаванні віз для ўладальнікаў дыпламатычных пашпартоў.

Гатоўнасць да “сумеснай працы па ўсіх напрамках” з Іарданіяй выказаў Аляксандр Лукашэнка, віншуючы 25 траўня 2025 года з Днём незалежнасці караля гэтай краіны Абдалу II.

У ліку такіх напрамкаў прэс-служба палітыка згадала “палітычную, гандлёва-эканамічную і гуманітарную сферы”.

Паводле слоў віншавальніка, пад кіраўніцтвам Абдалы ІІ Іарданія “паспяхова рухаецца па шляху стабільнага развіцця, актыўна ўдзельнічае ў вырашэнні важных пытанняў рэгіянальнага парадку дня, умацоўвае свае пазіцыі на міжнароднай арэне”.

“Цёплыя стасункі і ўзаемаразуменне паміж народамі Беларусі і Іарданіі з’яўляюцца трывалым фундаментам для пашырэння двухбаковых сувязей у розных галінах”, — гаварылася ў віншаванні.

У аналагічным пасланні ў 2024 годзе віншавальнік назваў Аманам сталіцу Іарданіі Амман. Ён заявіў, што беларускія ўлады “нацэленыя на паглыбленне дружалюбных, узаемапаважлівых стасункаў” з гэтай дзяржавай.

Дыпламатычныя стасункі паміж Беларусь і Іарданіяй усталяваныя 15 кастрычніка 1996 года. Актуальных даных пра ўзровень тавараабароту паміж імі няма. Паводле даных адкрытых крыніц, у 2022 годзе ён склаў 2,2 млн долараў.