Паразмаўляць з вызваленымі беларусамі Зяленскага папрасілі “замежныя партнёры”, лічыць прадстаўнік АПК Кабанчук

16 снежня, Позірк. Правесці размову з часткай вызваленых і вывезеных 13 снежня ва Украіну беларускіх экс-палітвязняў прэзідэнта Уладзіміра Зяленскага “папрасілі замежныя партнёры”, лічыць прадстаўнік Аб’яднанага пераходнага кабінета (АПК) па абароне і нацыянальнай бяспецы, былы намеснік камандзіра палка Каліноўскага Вадзім Кабанчук.

Сваё меркаванне ён выказаў у эфіры ютуб-канала “Звычайная раніца” 16 снежня.

Пры гэтым палітык адмовіўся называць, каго менавіта мае на ўвазе, дадаўшы, што “гэта відавочна не [Аляксандр] Лукашэнка”.

Згаданую размову Кабанчук назваў “палітычным сігналам для беларускай дэмакратычнай грамадскасці, <…>, што Украіна звяртае ўвагу” на яе.

“Мне хочацца спадзявацца, што ўсё ж мы з Украінай цяпер будзем выходзіць на больш цесны, больш інтэнсіўны ўзровень адносін — дэмакратычныя сілы”, — дадаў прадстаўнік АПК.

Напярэдадні Зяленскі ў сваім тэлеграм-канале паведаміў пра размову праз відэасувязь з вызваленымі беларускімі палітвязнямі.

“Вельмі цаню добрыя словы пра Украіну і ўкраінцаў і выразную, прынцыповую пазіцыю наконт расійскай агрэсіі. Гэта важна. Украіна і надалей будзе дапамагаць усім, хто дапамагае нам абараняць незалежнасць і жыццё людзей”, — падкрэсліў ён.

У размове ўдзельнічалі Віктар Бабарыка, Марыя Калеснікава, Максім Знак, Уладзімір Лабковіч, Марына Золатава і Аляксандр Федута.

Праз некалькі гадзін тэлеграм-канал прыхільнікаў Бабарыкі выклаў пазіцыі яго і Калеснікавай, агучаныя на анлайн-сустрэчы.

Экс-прэтэндэнт у прэзідэнты “заявіў, што акты агрэсіі супраць суверэннай дзяржавы і грубыя парушэнні міжнароднага права абсалютна непрымальныя ў сучасным свеце”: “Паводле яго слоў, у дадзеным выпадку гаворка ідзе пра капрыз абмежаванай колькасці людзей, надзеленых уладай і якія жадаюць утрымаць яе любой цаной, наступствы якога разбураюць давер паміж нашымі краінамі і наносяць урон бяспецы ўсяго рэгіёна”.

Калеснікава “падкрэсліла, што цалкам падтрымлівае Украіну ў яе барацьбе за свабоду і суверэнітэт, і адзначыла, што яе сэрца — з народам Украіны”.