Палітвязнямі прызнана яшчэ сем чалавек

17 снежня, Позірк. Праваабарончая супольнасць прызнала палітычнымі зняволенымі яшчэ сем чалавек, вынікае з сумеснай заявы, апублікаванай 17 снежня ў тым ліку на сайце праваабарончага цэнтру “Вясна”.

Адпаведны статус нададзены прыгавораным да пазбаўлення волі на невядомы тэрмін Вячаславу Круку (арт. 130, 368, 369 Крымінальнага кодэкса), Раману Гусейнаву і Сяргею Цвікевічу (абодва — арт. 130, 361), Дзмітрыю Ковачу (130, 342), Валянціну Панасюку (арт. 356), а таксама Дзмітрыю Карасёву (арт. 130; 4 гады зняволення) ды Мікалаю Віткоўскаму (арт. 356; 15 гадоў).

Адзначаецца, што Віткоўскі і Панасюк “былі асуджаныя з грубымі парушэннямі права на справядлівы суд”.

Праваабаронцы патрабуюць неадкладна вызваліць усіх палітвязняў і спыніць рэпрэсіі ў Беларусі.

Апрача “Вясны” заяву падпісалі “Прававая ініцыятыва”, Беларускі Хельсінкскі камітэт, Беларуская асацыяцыя журналістаў, Беларускі дом правоў чалавека імя Б. Звозскава, Беларускі ПЭН, Human Constanta, Respect-Protect-Fulfill, Lawtrend.

На 17 снежня ў Беларусі 1.112 чалавек, якіх гэтая група праваабарончых арганізацый прызнае палітвязнямі. Рэальная колькасць людзей, якія зазналі рэпрэсіі ў той ці іншай форме, можа быць значна большай.

Даведка “Позірку”:

• арт. 130 — распальванне расавай, нацыянальнай, рэлігійнай або іншай сацыяльнай варожасці або варажнечы;
• арт. 342 — арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх;
• арт. 356 — здрада дзяржаве;
• арт. 361 — заклікі да мер абмежавальнага характару (санкцый), іншых дзеянняў, скіраваных на нанясенне шкоды нацыянальнай бяспецы;
• арт. 368 — абраза прэзідэнта;
• арт. 369 — абраза прадстаўніка ўлады.