17 снежня, Позірк. Арэндная плата за зямельныя ўчасткі, якія знаходзяцца ў дзяржаўнай уласнасці, будзе роўная памеру зямельнага падатку, які вылічваецца ў адпаведнасці з падатковым заканадаўствам. Такое новаўвядзенне прадугледжана падпісаным 17 снежня Аляксандрам Лукашэнкам указам № 439 “Аб арэнднай плаце за зямельныя ўчасткі, якія знаходзяцца ў дзяржаўнай уласнасці”.
Як паведамляе яго прэс-служба, пры гэтым на плацельшчыкаў арэнднай платы будуць распаўсюджвацца прадугледжаныя Падатковым кодэксам ільготы па зямельным падатку.
Захоўваюцца дзейныя цяпер тэрміны выплаты арэнднай платы, а таксама тэрміны прадастаўлення юрыдычнымі асобамі сум арэнднай платы ў падатковыя органы.
Адзначаецца, што “дагаворы арэнды будуць прыводзіцца ў адпаведнасць з Указам паступова — пры паступленні заяў ад арандатараў, у выпадку прадаўжэння тэрмінаў арэнды зямельных участкаў і пры прыняцці мясцовымі органамі ўлады, адміністрацыямі свабодных эканамічных зон (СЭЗ) рашэнняў аб дзяржаўнай рэгістрацыі змянення прадастаўленых у арэнду зямельных участкаў”.
З 1 студзеня 2026 года палажэнні ўказа будуць прымяняцца да ўсіх зямельных участкаў, якія знаходзяцца ў дзяржаўнай уласнасці і прадастаўлены ў арэнду мясцовымі выканаўчымі камітэтамі, адміністрацыямі СЭЗ.
Сцвярджаецца, што меры, прадугледжаныя ўказам, накіраваны на ўдасканаленне сістэмы спагнання арэнднай платы за зямельныя ўчасткі і стварэнне роўных умоў для ўсіх землекарыстальнікаў незалежна ад віду правоў на зямельныя ўчасткі.
Цяпер, згодна з інфармацыяй на сайце Міністэрства па падатках і зборах (МПЗ), для фізічных асоб памер штогадовай арэнднай платы за зямельныя ўчасткі, якія знаходзяцца ў дзяржаўнай уласнасці, устанаўліваецца мясцовым выканаўчым камітэтам або адміністрацыяй СЭЗ.
Стаўкі зямельнага падатку ўстанаўліваюцца ў залежнасці ад функцыянальнага выкарыстання зямельных участкаў і ад таго, якая падатковая база (кадастравы кошт або плошча зямельнага ўчастка) прымяняецца пры яго вылічэнні.
Аўтарызавацца
Забыліся пароль?
Выхад з профілю
