Чабатар назваў дэглабалізацыю і лічбавізацыю рызыкамі для эканомікі

17 снежня, Позірк. Рызыкамі для беларускай эканомікі з’яўляецца дэглабалізацыя і лічбавізацыя, неабходна ператварыць іх у “магчымасці росту”, заявіў міністр эканомікі Юрый Чабатар у інтэрв’ю тэлеканалу “Беларусь 1”.

“Усё гэта, вядома, мы вывучылі. І вось гэтыя моманты мы прадугледзелі ў праграме (сацыяльна-эканамічнага развіцця да 2026 года, — “Позірк”.) праз прызму пастаноўкі задач, каб [рызыкі] зрабіць для нашай краіны перавагамі”, — падкрэсліў чыноўнік.

Паводле яго, пры распрацоўцы новай праграмы ўрад пастараўся зрабіць дакумент “прасцей і даступней”: “[Вызначаны] сем прыярытэтаў, а на кожны прыярытэт сем напрамкаў. Такім чынам, мы ведаем, праз якія задачы і індыкатары мы будзем дасягаць і маніторыць, адпаведна, выкананне пяцігадовай праграмы. Яна стала кампактнай, таму мы індыкатараў. тром асноўным блокам“.

Першы блок — макраэканамічны (рост ВУП, інфляцыя), другі — інстытуцыянальны (сфера фінансавага, страхавога рынку), трэці — “характарызуе дасягненні нашых прыярытэтаў і напрамкаў”.

“Мы адразу ўсе індыкатары поўнасцю і ўсе задачы з пяцігадовай праграмы пагрузілі ў адпаведныя дзяржаўныя або галіновыя праграмы. Мы цяпер дакладна сёння ўжо ведаем, дзе, хто і як будзе рэалізоўваць, і хто будзе адказным за дасягненне гэтых індыкатараў”, — сказаў кіраўнік Мінэканомікі.

Пад праграму на пяцігоддзе, адзначыў спікер, распрацавана 20 дзяржаўных і 17 галіновых праграм: “Ключавы тут, гэта інвестыцыйны напрамак, з’яўленне новых вытворчасцей. Дзякуючы гэтай рабоце, мы ведаем, што ў будучай пяцігодцы мы рэалізуем больш як 700 праектаў <…> на 37 млрд рублёў”.

У якасці іх напрамкаў ён назваў нафтахімію (непаліўныя прадукты), дрэваапрацоўку (вытворчасць мэблі).

Чабатар 12 снежня заявіў, што рэалізацыя ўсіх запланаваных мерапрыемстваў у рамках Праграмы сацыяльна-эканамічнага развіцця краіны на 2026–2030 гады дасць магчымасць павялічыць ВУП на 15,8 працэнта, экспарт тавараў і паслуг — у 1,2 раза, інвестыцый — на 16,7%, рэальных даходаў насельніцтва — у 1,2 раза.

У выніку некалькіх этапаў абмеркавання ўлады вызначылі наступныя галоўныя кірункі на перыяд да 2030 года: дэмаграфічная бяспека; развіццё чалавечага патэнцыялу, якасная адукацыя, выхаванне гарманічнай і патрыятычнай асобы; стварэнне якаснага і зручнага асяроддзя для жыцця; рост канкурэнтаздольнасці, паскарэнне тэхналагічнага развіцця і лічбавая трансфармацыя; моцныя рэгіёны; умацаванне абараназдольнасці і развіццё ВПК; турызм.

Аб дапрацоўцы праекта праграмы сацыяльна-эканамічнага развіцця Беларусі на 2026–2030 гады паведаміў 30 кастрычніка старшыня праўлення Нацыянальнага банка, былы прэм’ер-міністр Раман Галоўчанка, які быў назначаны Аляксандрам Лукашэнкам кіраўніком адпаведнай спецыяльнай групы.

Праграма павінна быць зацверджаная на чарговым паседжанні Усебеларускага народнага сходу (складаецца толькі з лаялістаў рэжыму), якое павінна прайсці ў Мінску 18–19 снежня.