У Гомелі праз аварыю без вады засталіся сем жылых дамоў

18 снежня, Позірк. Аварыйнае адключэнне халоднага і гарачага водазабеспячэння здарылася ў Гомелі 18 снежня ў 11.20, паведамляецца ў афіцыйным тэлеграм-канале старшыні гарвыканкама Уладзіміра Прывалава.

Інцыдэнт, як адзначаецца, выкліканы прарывам вадаправода.

Паводле інфармацыі чыноўніка, парыў вадаправода здарыўся на ўводзе ў цэнтральным цеплавым пункце №27 (ЦТП) па вуліцы Рошчынскай, 64. Халоднае і гарачае водазабеспячэнне перакрыта для сямі жылых дамоў: па вуліцы Рошчынская (2, 2а, 6, 8) і на пр. Касманаўтаў (56, 58, 60).

Прывалаў паведаміў, што адкрытыя вулічныя вадаправодныя калонкі па вуліцы Рошчынская, 10 і 2-я Гомсельмашаўская, 9. Паведамляецца, што працуе брыгада КВУП “Гомельводаканал”, запланаваны час завяршэння работ — 17 гадзін.

“Просьба да грамадзян захоўваць спакой. Сітуацыя пад кантролем. Адпаведныя службы робяць усё магчымае для аднаўлення водазабеспячэння”, — заявіў кіраўнік гарвыканкама.

Міністэрства па надзвычайных сітуацыях у сутачнай зводцы 18 снежня паведаміла аб выбуху газапаветранай сумесі ў кватэры на сёмым паверсе дзесяціпавярховага панэльнага жылога дома ў Гомелі па вул. Косарава, 3.

“У выніку выбуху адбылося абвальванне пліт перакрыццяў жылых пакояў з восьмага па шосты паверхі, пашкоджана вонкавая сценавая панэль дома”, — гаворыцца ў зводцы.

Пазней улады паведамілі пра дэмантаж верхніх паверхаў пашкоджанага пад’езда.

21 лістапада ў Гомелі адбылося аварыйнае адключэнне халоднага водазабеспячэння ў Цэнтральным раёне па прычыне парыву трубаправода па вуліцы Дынды. Было адключана халоднае водазабеспячэнне ў двух жылых дамах: па вул. Кірава, 141 (140 кватэр) і 149 (119 кватэр).