Упершыню ў праграму сацыяльна-эканамічнага развіцця ўключаны абаронны сектар

19 снежня, Позірк. У праграму сацыяльна-эканамічнага развіцця Беларусі на 2026–2030 гады ў якасці аднаго з напрамкаў уключаны абаронны сектар, паведаміў старшыня Палаты прадстаўнікоў Ігар Сергеенка дзяржСМІ 19 снежня. Відэакаментар апублікавала прэс-служба ПП НС.

Паводле слоў Сергеенкі, развіццё абараназдольнасці, ваенна-прамысловага сектара і “ў цэлым бяспека Беларусі“ выступае сярод прыярытэтаў праграмы.

“Да 89% узбраенняў і тэхнікі ўласнай вытворчасці. Гэта дастаткова сур’ёзная лічба“, — сказаў ён.

Як паведамлялася, праектам праграмы было вызначана сем прыярытэтаў на пяцігоддзе: “дэмаграфічная бяспека; развіццё чалавечага патэнцыялу, якасная адукацыя, выхаванне гарманічнай і патрыятычнай асобы; стварэнне якаснага і зручнага асяроддзя для жыцця; рост канкурэнтаздольнасці, паскарэнне тэхналагічнага развіцця і лічбавая трансфармацыя; моцныя рэгіёны; умацаванне абараназдольнасці і развіццё ВПК; турызм“.

У ранейшых праграмах абараназдольнасць як асобны напрамак не згадвалася.

Праграма сацыяльна-эканамічнага развіцця на 2026–2030 гады зацверджана падчас пасяджэння VII Усебеларускага народнага сходу аднагалосна 19 снежня.

Прэм’ер-міністр Аляксандр Турчын заявіў, што на фоне “геапалітычнай нестабільнасці і запавольвання тэмпаў сусветнай эканомікі“ чаканы ўладамі рост эканомікі Беларусі складзе не менш як 3% за год, за ўсю “пяцігодку“ — 15,8%.

Акрамя таго, улады чакаюць павелічэння экспарту тавараў і паслуг у 1,2 раза, інвестыцый — на 16,7%, рэальных даходаў насельніцтва — у 1,2 раза.

Перад прыняццем праграмы на працягу некалькіх гадзін праходзілі “дэбаты“, удзельнікі якіх у фінале сваіх выступаў нязменна заяўлялі аб падтрымцы дакумента і прапаноўвалі ВНС яго зацвердзіць.

Дакумент павінен быць зацверджаны ўказам Аляксандра Лукашэнкі.