У Валожынскім раёне аўтамабіль збіў пяцігадовае дзіця — пацярпелае памерла ў бальніцы

20 снежня, Позірк. Пяцігадовае дзіця памерла пасля дарожна-транспартнага здарэння 20 снежня ў Валожынскім раёне, паведамляе УУС Мінаблвыканкама.

Паводле інфармацыі ведамства, каля 17:40 на вул. Моладзевай у вёсцы Пральнікі 38-гадовы мясцовы жыхар за рулём аўтамабіля “Опель” наехаў на малалетняга пешахода. Паводле слоў кіроўцы, дзіця “раптоўна выбегла на праезную частку”.

Адзначаецца, што кіроўца і бацька пацярпелага даставілі яго ў медустанову, аднак выратаваць дзіця не атрымалася.

Праводзіцца праверка.

Дзяржаўтаінспекцыя Мінскай вобласці заклікала кіроўцаў быць вельмі пільнымі “пры руху па дваровай тэрыторыі”, кантраляваць бяспечную хуткасць руху.

Бацькам жа “неабходна праяўляць пільнасць” — не выпускаць з поля зроку сваё дзіця, малалетніх дзяцей паблізу праезнай часткі заўсёды трымаць за руку.