Двое непаўналетніх пацярпелі ў ДТЗ у Чэрыкаўскім раёне

21 снежня, Позірк. Аб дарожна-транспартным здарэнні з пацярпелымі ў Чэрыкаўскім раёне паведамляе УУС Магілёўскага аблвыканкама

ДТЗ адбылося ўвечары 20 снежня каля вёскі Удога.

“29-гадовая кіроўца “Мэрсэдэс GL500″, здзяйсняючы паварот налева, пры выбары хуткасці не ўлічыла ўмовы надвор’я і дарожныя ўмовы. Як вынік — яна страціла кантроль над кіраваннем, з’ехала ў кювет, пасля чаго транспартны сродак перакуліўся”, — гаворыцца ў паведамленні.

Адзначаецца, што, акрамя кіроўцы, пацярпелі пасажыры — 53-гадовая жанчына і двое непаўналетніх 10 і 17 гадоў.

Непаўналетнія дастаўленыя ў медустанову для агляду, паведамляе УУС.

“Дзяржаўтаінспекцыя заклікае быць асцярожнымі, не ствараць сваімі неабдуманымі дзеяннямі перадумоў да здзяйснення ДТЗ. У зімовы перыяд будзьце асабліва ўважлівымі, улічваючы ўсе фактары”, — заяўляецца ў рэлізе.

Раней паведамлялася аб гібелі пяцігадовага дзіцяці ў выніку аўтааварыі 20 снежня ў Валожынскім раёне (Мінская вобласць).