Аб’ём здабываемай нафты ў Беларусі да 2030 года плануецца павялічыць у 16 разоў

24 снежня, Позірк. “Прырост здабываемых прагнозных рэсурсаў нафты” павінен вырасці ў Беларусі за пяць гадоў з 250 тыс. да 4.050 тыс. тон (у 16,2 раза), вынікае з дзяржпраграмы “Нетры” на 2026– 2030 гады, апублікаванай на Нацыянальным прававым партале 24 снежня.

Савет міністраў зацвердзіў дакумент пастановай №740 ад 20 снежня, ён уступае ў сілу з 1 студзеня.

Аб’ём фінансавання праграмы складзе 276 млн 75 тыс. 24 рублі, з якіх 273 млн 368 тыс. 924 рублі — сродкі рэспубліканскага бюджэту, астатняе — уласныя сродкі арганізацый. Адказным заказчыкам дзяржпраграмы з’яўляецца Міністэрства прыродных рэсурсаў і навакольнага асяроддзя.

Праграма, як адзначана, накіраваная на “павышэнне ўзроўню геалагічнай вывучанасці тэрыторыі, узнаўленне і развіццё мінеральна-сыравіннай базы, павышэнне эфектыўнасці выкарыстання карысных выкапняў”.

У рамках праграмы будзе праводзіцца рэгіянальнае вывучэнне нетраў (геафізічныя, геолагаздымачныя работы, параметрычнае бурэнне, тэматычныя работы і метадычнае суправаджэнне) і складанне геалагічных карт новага пакалення маштабу 1:200 000. Плануецца пакрыць 60% тэрыторыі Беларусі такімі картамі новага пакалення (цяпер 42%).

Плануецца нарошчваць уласны “паліўна-энергетычны патэнцыял” і праводзіць “пошук, ацэнку, выведку і падрыхтоўку да прамысловага асваення новых радовішчаў будаўнічых матэрыялаў і іншых відаў сыравіны”.

На нарадзе аб стане і развіцці мінеральна-сыравіннай базы 12 сакавіка Аляксандр Лукашэнка заявіў, што ў Беларусі дрэнна шукаюць карысныя выкапні.

“Усе карысныя выкапні — наш нацыянальны здабытак, — адзначыў ён. — Стратэгічны запас, які належыць народу. І толькі народу. Гэта і калій, і нафта, і самы вялікі рэсурс — прэсная вада (бясцэнны рэсурс), і многае іншае. Але з тым, што мы маем, трэба пісьменна і па-гаспадарску распараджацца. А тое, што не маем, трэба шукаць. Шукаем дрэнна”.

20 красавіка ў Талачыне (Віцебская вобласць) Лукашэнка прызнаў, што ў Беларусі няма вуглевадародаў у той колькасці, каб прадаваць за мяжу. “Гасподзь нам нафты-газу ў гэтую зямельку не ўклаў, каб мы маглі пампануць, па трубе камусьці прадаць, а грошы падзяліць. У нас гэтага няма, мы ўсё сваімі рукамі зарабляем”, — заявіў палітык.

22 красавіка, прызначаючы Сяргея Масляка міністрам прыродных рэсурсаў і аховы навакольнага асяроддзя, Лукашэнка заявіў: “Я не веру, што ў нас няма вялікіх аб’ёмаў нафты”.

“Скажу прама: трэба капаць і шукаць, — сказаў ён. — Акрамя гэтага, трэба, каб ты прымусіў усіх у гэтым кірунку працаваць. Я не веру, што ў нашых нетрах няма таго, што нам трэба. Вось калі хоць у нейкай ступені вырашыш гэтую задачу, гэта помнік можна ставіць у любым месцы”.

Пра неабходнасць далейшых пошукаў у Беларусі радовішчаў нафты Лукашэнка таксама заяўляў 22 ліпеня на нарадзе ў пытаннях здабычы вуглевадароднай сыравіны.

Звярнуўшы ўвагу на падрыхтаваны ўрадам план правядзення геолагаразведачных работ, палітык адзначыў, што “тэрміны іх выканання, як звычайна, зацягнутыя — да 2030 года”.

“Мы вельмі сур’ёзна абмяркоўвалі праблему, — сказаў ён. — Гэта не толькі нафта і газ. Гэта і іншыя нашы запасы мінеральныя. Сёлета плануецца выйсці на 2 млн тон нафты”.

Паводле сцвярджэння Лукашэнкі, у Беларусі ў гэтай сферы “ёсць рэзервы”, таму “трэба не разгойдвацца, а свідраваць і свідраваць з розумам і з укараненнем новых тэхналогій”.

Тэрыторыя Беларусі добра вывучана “геолагамі, нафтавікамі, спецыялістамі ў газавай галіне” — “сур’ёзных камерцыйных запасаў нафты і газу” не выяўлена, заяўляў у эфіры ютуб-канала “Папулярная палітыка” ў 2024 годзе расійскі нафтагазавы эксперт Міхаіл Круціхін, каментуючы неаслабнае жаданне Лукашэнкі знайсці ў айчынных нетрах вуглевадароды.