На 29 снежня ў трох абласцях і Мінску аб’яўлены аранжавы ўзровень небяспекі

28 снежня, Позірк. Аранжавы ўзровень небяспекі праз непагадзь абвешчаны на 29 снежня ў Мінску, Мінскай, Гродзенскай і Брэсцкай абласцях, паведамляе Міністэрства па надзвычайных сітуацыях.

Паводле звестак Белгідрамета, 28 снежня ў краіне тэмпература паветра складае ад -2 да +3 градусаў.

“Хмарна. На большай частцы тэрыторыі снег, мокры снег. месцамі мяцеліца. На асобных участках дарог галалёдзіца. Вецер паўночна-заходні ў многіх раёнах моцны парывісты, па захадзе месцамі парывы да 24 м/з”, — гаворыцца ў паведамленні ведамства.

На 29 снежня Белгідрамет выпусціў “папярэджанне аб неспрыяльнай гідраметэаралагічнай з’яве”.

Уначы, як паведамляецца, “па заходняй палове рэспублікі і ў Мінску захаваецца ўзмацненне паўночна-заходняга ветру парывамі 15–18 м/с”.

У мінулыя дні ў Беларусі выпала шмат снегу. Камунальныя службы занятыя ў яго ўборцы. У прыватнасці, у Мінску ў работах прымалі ўдзел 1.030 супрацоўнікі адпаведных службаў і 31 адзінка тэхнікі.