За год ЕС інвеставаў у адукацыйныя праграмы беларусаў больш за 2 млн еўра — АПК

31 снежня, Позірк. У 2025 годзе Еўрасаюз інвеставаў у розныя адукацыйныя праграмы беларусаў больш за 2 млн еўра, заявіла прадстаўніца па маладзёжнай палітыцы і студэнцтве Аб’яднанага пераходнага кабінета (АПК) Маргарыта Ворыхава.

Паводле яе слоў, беларусамі за год атрымана больш за 300 акадэмічных стыпендый у краінах ЕС, таксама было падтрымана каля 150 беларускіх магістрантаў.

Больш за 1.000 беларусаў прынялі ўдзел у праграмах абмену і валанцёрства Еўрасаюза, падтрыманыя каля 300 маладых прафесіяналаў у галіне прадпрымальніцтва.

Акрамя гэтага, па лініі ЕС праведзена больш за 250 індывідуальных кансультацый і больш за 10 семінараў і трэнінгаў для моладзі па ўмацаванні яе патэнцыялу.

Прадстаўніца АПК адзначыла, што маладыя беларусы засноўваюць стартапы і паспяхова прыцягваюць міжнародны капітал: сёлета маладыя заснавальнікі атрымалі на гэтыя мэты больш за 600 тыс. долараў.

Сярод праблем Ворыхава назвала бар’еры для беларусаў, якія не даюць магчымасць “тысячам выпускнікоў школ паступаць ва ўніверсітэты ЕС”. Паводле яе слоў, “некаторыя праграмы ЕС тэхнічна застаюцца закрытымі”, пры тым што “адукацыйныя рэпрэсіі ўнутры Беларусі працягваюць штурхаць людзей у вымушаную міграцыю”.

Ворыхава падкрэсліла, што паводле наяўных даных, 48% беларускіх мігрантаў паведамляюць аб “поўнай страце кар’еры за мяжой”. “Гэта азначае, што падтрымку інтэграцыі на рынку працы ЕС трэба пашыраць, прызнанне прафесійных кваліфікацый павінна паляпшацца, шляхі інвестыцый у вяртанне [спецыялістаў] трэба ствараць ужо цяпер”, — сказала прадстаўніца АПК.