Унесеную ў мора ў Мурманскай вобласці беларуску шукаюць з вечара 1 студзеня

3 студзеня, Позірк. Паўтара сутак працягваюцца ў Мурманскай вобласці (РФ) пошукі зніклай грамадзянкі Беларусі 1968 года нараджэння, вынікае з паведамлення беларускай амбасады ў Расіі.

Увечары 2 студзеня дыпмісія пацвердзіла, што 1 студзеня 2026 года жанчыну “ўнесла ў мора падчас групавых заняткаў айс-флаацінгам у акваторыі ракі Тулома”.

“На месцы здарэння складаныя ўмовы надвор’я і нізкая тэмпература. Паводле аператыўнай інфармацыі, на 20:00 2 студзеня 2026 года зніклая грамадзянка не выяўленая. Пошукавая аперацыя будзе працягнутая”, — адзначылі ў амбасадзе.

Падкрэсліваецца, што генеральнае консульства Беларусі ў Санкт-Пецярбургу “знаходзіцца ў пастаянным кантакце з рэгіянальнымі следчымі органамі і выратавальнымі службамі”.

Паводле звестак расійскіх СМІ, беларуску ўнесла ў мора ўвечары 1 студзеня. Паведамлялася, што яна “плавала ў гідракасцюме разам з групай у акваторыі ракі Туломы” (упадае ў Баранцава мора).

Адзначалася, што Следчы камітэт Мурманскай вобласці распачаў крымінальную справу па факце інцыдэнту.

Ас-флаацінг — купанне ў халодным вадаёме ў спецыяльным ўцепленым гідракасцюме. Зарадзіўся ў Скандынаўскіх краінах каля 10 гадоў таму.