Масква і Мінск патрабуюць ад ЗША вярнуць Мадуру ў Каракас і аднавіць на пасадзе кіраўніка дзяржавы — МЗС РФ
Нікалас Мадура (злева) і Аляксандр Лукашэнка на саміце БРІКС у Расіі ў 2024 годзе
3 студзеня, Позірк. “Абмен думкамі аб сітуацыі вакол Венесуэлы” правялі міністры замежных спраў Расіі Сяргей Лаўроў і Беларусі Максім Рыжанкоў у тэлефоннай размове 3 студзеня, паведаміла расійскае знешнепалітычнае ведамства.
“Падкрэслена, што Масква і Мінск адзіныя ў рашучым асуджэнні агрэсіі, учыненай ЗША супраць суверэннай дзяржавы ў парушэнне міжнародна-прававых нормаў. Акцэнтаваная безумоўная неабходнасць неадкладна вызваліць законнага прэзідэнта Венесуэлы Н.Мадуру і ягоную жонку, вярнуць іх у сталіцу краіны [з ЗША] і аднавіць Н.Мадуру на пасадзе кіраўніка дзяржавы”, — гаворыцца ў прэс-рэлізе.
“Адзначана таксама важнасць хутчэйшага стварэння ўмоў для ўрэгулявання сітуацыі вакол Венесуэлы шляхам дыялогу ў адпаведнасці з міжнародным правам”, — падкрэсліў МЗС РФ, якая ў парушэнне міжнароднага права з 2014 года вядзе вайну супраць Украіны і анэксавала частку яе тэрыторыі.
Раней беларускі МЗС “катэгарычна асудзіў узброеную агрэсію, учыненую 3 студзеня 2026 года супраць суверэннай дзяржавы Венесуэла”. Падкрэслена, што беларускі бок разглядае гэтую агрэсію як “прамую пагрозу міжнароднаму міру і бяспецы”, заяўляе аб “сваёй непахіснай падтрымцы законнага ўрада Венесуэлы” і “далучаецца да закліку аб тэрміновым скліканні Савета Бяспекі ААН, на які ўскладзена галоўная адказнасць за падтрыманне міру”.
Заяўлялася, што “права венесуэльскага народа самастойна вызначаць свой лёс з’яўляецца непарушным”, “ніякія формы вонкавага ўмяшання, асабліва сілавога, не могуць быць апраўданыя”.
Ад каго зыходзіла агрэсія супраць Венесуэлы, у рэлізе не паведамлялася.
3 студзеня ведамства таксама паведаміла аб тэлефоннай размове Рыжанкова з венесуэльскім калегам Іванам Хілем. Беларускі міністр “выказаў падтрымку ўраду Венесуэлы ў яе пазіцыі, звязанай з суверэнітэтам, захаваннем законна абранай у краіне ўлады і ініцыятывам Каракаса, у тым ліку ў міжнародных арганізацыях“.
Раней “акт амерыканскай агрэсіі” супраць Венесуэлы вуснамі свайго прэс-сакратара Наталлі Эйсмант асудзіў Аляксандр Лукашэнка.
“Сёння маё сэрца з народам Венесуэлы”, — напісала беларускі дэмакратычны лідар Святлана Ціханоўская. “Я спадзяюся, што нядаўнія падзеі прынясуць справядлівасць, свабоду і вяршэнства закона, якія венесуэльцы даўно заслужылі і за якія адважна змагаліся. Дыктатары не вечныя — і, падобна, сёння нелегітымны Лукашэнка страціў яшчэ аднаго блізкага сябра”, — падкрэсліла палітык.
Раней прэзідэнт ЗША Дональд Трамп неаднаразова пагражаў нанесці ўдары па Венесуэле, абвінавачваючы ўлады гэтай краіны ў “наркатэрарызме”. У 2025 годзе Вашынгтон павялічыў вайсковую прысутнасць ля берагоў Венесуэлы, амерыканскія вайскоўцы рэгулярна наносілі ўдары па малых судах, тлумачачы гэта тым, што яны перавозяць у ЗША наркотыкі.
Мадура, затрыманы і вывезены з жонкай у ЗША, кіраваў Венесуэлай з 2013 года — пасля смерці папярэдняга аўтарытарнага кіраўніка Уга Чавеса. Супраць Венесуэлы ўведзеныя міжнародныя санкцыі.
Парламенцкія і рэгіянальныя выбары прайшлі ў Венесуэле ў траўні. Паводле афіцыйных звестак, перамогу ў абедзвюх кампаніях атрымала кааліцыя Мадуры Вялікі патрыятычны полюс Сымона Балівара. У парламенце блок атрымаў 256 месцаў з 285. Апазіцыя заклікала да байкоту выбараў, паводле афіцыйных звестак, яўка склала менш за 43%.
У ліпені 2024-га ў Венесуэле адбыліся прэзідэнцкія выбары, пераможцам якіх у трэці раз быў абвешчаны Мадура. Паводле афіцыйнай інфармацыі, ён набраў 51,2% галасоў, нязначна апярэдзіўшы кандыдата аб’яднанай апазіцыі-былога дыпламата Эдмунда Гансалеса (44,2%). Паводле звестак незалежных экзітполаў, Гансалеса падтрымала 65% выбаршчыкаў, а Мадура — ад 14% да 31%.
Пасля выбараў у краіне пачаліся пратэсты апазіцыі. Паводле інфармацыі мясцовых СМІ, у Каракасе паліцыя і вайскоўцы ўжывалі супраць пратэстоўцаў слёзатачывы газ і гумовыя кулі. Пратэсты былі канчаткова падаўленыя ў пачатку жніўня мінулага года. Загінула прынамсі 28 чалавек, каля 200 былі параненыя. Улады арыштавалі каля 2.000 чалавек, з’явіліся паведамленні, што некаторыя падвергліся катаванням.
Пасля частка апанентаў рэжыму была адпушчаная з месцаў несвабоды.
Дэмакратычныя краіны не прызналі вынікі выбараў. Шэраг дзяржаў, уключаючы ЗША, прызналі Гансалеса абраным прэзідэнтам. Ён быў вымушаны пакінуць краіну з-за пагрозы арышту летась у верасні.
