Латушка пра звяржэнне Мадуры: Калі няма дыялогу з грамадствам і падтрымкі народа, канец улады заўсёды нечаканы і жорсткі

3 студзеня, Позірк. “Калі няма дыялогу з грамадствам і падтрымкі народа, канец улады заўсёды нечаканы і жорсткі”, — заявіў у сваім тэлеграм-канале намеснік кіраўніка Аб’яднанага пераходнага кабінета (АПК), кіраўнік Народнага антыкрызіснага ўпраўлення (НАУ) Павел Латушка.

Суправадзіўшы свой каментарый фота Аляксандра Лукашэнкі са зрынутым 3 студзеня амерыканскімі вайскоўцамі прэзідэнтам Венесуэлы Нікаласам Мадурам, палітык падкрэсліў: “Адзіны сцэнарый для атачэння Лукашэнкі — ужо цяпер зрабіць усё неабходнае для зменаў у Беларусі мірным спосабам — круглы стол”.

“Час працуе супраць дыктатуры”, — адзначыў Латушка.

9 жніўня з ініцыятывай правесці нацыянальны дыялог для мірнага вырашэння глыбокага палітычнага і грамадскага крызісу ў Беларусі афіцыйна выступіў АПК.

У заяве адзначалася, што ў 2021 годзе такую прапанову падтрымала больш за 700 тыс. чалавек, якія прагаласавалі на платформе “Голас”. Кабінет заклікаў арганізаваць круглы стол з удзелам усіх палітычных і грамадскіх сіл.

Пра намер АПК ініцыяваць нацыянальны дыялог заявіў за дзень да гэтага Латушка.

Пазіцыя АПК была выпрацаваная 7 жніўня ў развіццё прапановы Ціханоўскай 15 ліпеня ў Брусэлі на 107-м семінары Роўз-Рот, арганізаваным Парламенцкай асамблеяй NATO ў партнёрстве з Еўрапарламентам.

Лукашэнка неаднаразова заяўляў аб немагчымасці якіх бы ні было перамоваў з апанентамі.

У ноч на 3 студзеня паводле распараджэння прэзідэнта Дональда Трампа ЗША нанеслі ўдары па аб’ектах на тэрыторыі Венесуэлы. У паветраную прастору краіны ўварвалася амерыканская авіяцыя.

У выніку ваеннай інфраструктуры быў нанесены ўрон. Мадура ўвёў у краіне надзвычайнае становішча, але неўзабаве стала вядома, што ён затрыманы і разам з жонкай вывезены ў ЗША.

Паводле паведамленняў амерыканскіх уладаў, Мадура паўстане перад судом у ЗША па крымінальных абвінавачваннях.

Раней Трамп неаднаразова пагражаў нанесці ўдары па Венесуэле, абвінавачваючы ўлады гэтай краіны ў “наркатэрарызме”. У 2025 годзе Вашынгтон павялічыў вайсковую прысутнасць ля берагоў Венесуэлы, амерыканскія вайскоўцы рэгулярна наносілі ўдары па малых судах, тлумачачы гэта тым, што яны перавозяць у ЗША наркотыкі.

Дэмакратычны лідар Святлана Ціханоўская 3 студзеня выказала надзею, што падзеі ў Венесуэле “прынясуць справядлівасць, свабоду і вяршэнства закона, якія венесуэльцы даўно заслужылі і за якія адважна змагаліся”. “Дыктатары не вечныя — і, падобна, сёння нелегітымны Лукашэнка страціў яшчэ аднаго блізкага сябра”, — адзначыла палітык.

Лукашэнка асудзіў “акт амерыканскай агрэсіі” супраць Венесуэлы. Міністэрства замежных спраў таксама асудзіла, але пры гэтым не згадала, ад каго зыходзіла “ўзброеная агрэсія”.

Мадура кіраваў Венесуэлай з 2013 года — пасля смерці ранейшага аўтарытарнага кіраўніка Уга Чавеса. Супраць Венесуэлы ўведзены шэраг міжнародных санкцый: за фальсіфікацыю выбараў, падаўленне мірных пратэстаў, палітычныя рэпрэсіі і інш.