У Нясвіжскім і Круглянскім раёнах у межах распараджэння Лукашэнкі пабудуюць тры жывёлагадоўчыя комплексы на 7,8 тыс. галоў бычкоў

12 студзеня, Позірк. Мінскі і Магілёўскі аблвыканкамы пацвердзілі намеры пабудаваць тры жывёлагадоўчыя комплексы “агульнай магутнасцю 7,8 тыс. галоў”, паведамляе прэс-служба Савета міністраў.

Пра гэта гаворыцца ў пастанове ўрада “Аб вызначэнні пераліку арганізацый і інвестыцыйных праектаў па ўзвядзенні, рэканструкцыі комплексаў па вырошчванні і адкорме бычкоў”.

У Нясвіжскім раёне (Мінская вобласць) чакаецца яго ўзвядзенне на тэрыторыях ЗАТ “1 Мая” і ААТ “Нясвіжскія астраўкі” (па 2,4 тыс. галоў кожны), а ў Круглянскім (Магілёўская) — на базе ЗАТ “ААБ-Агра Цяцерына” (3 тыс.).

Будаўніцтва і рэканструкцыю ў 2026-2030 гадах спецыялізаваных комплексаў “па вырошчванні і адкорме бычкоў у сельскагаспадарчых або перапрацоўчых арганізацыях, якія ажыццяўляюць вытворчасць сельгаспрадукцыі” прадугледжвае ўказ № 2 ад 5 студзеня “Аб развіцці мясной галіны”.

Дакументам, акрамя іншага, запланаваны субсідыі па інвестпраектах на выплату працэнтаў за карыстанне крэдытамі на раўнадолевай аснове за кошт сродкаў рэспубліканскага і мясцовых бюджэтаў, а таксама парадак і ўмовы іх прадастаўлення. Акрамя таго, магчыма прадастаўленне крэдытных рэсурсаў Банка развіцця з тэрмінам да 20 гадоў і выплатай працэнтаў у памеры стаўкі рэфінансавання. Пры гэтым замацаваны ліміт крэдытавання з разліку 85 базавых велічынь на адно жывёла-месца.

Пагалоўе буйной рагатай жывёлы (БРЖ; каровы, быкі і інш.) на канец кастрычніка 2025 года склала 3.915.838 галоў — на 2,6% менш, чым было годам раней (4.018.755), вынікае з праведзенага “Позіркам” аналізу даных Нацыянальнага статыстычнага камітэта.