Муж і жонка Дзмітрый і Вольга Капузы з Драгічынскага раёна асуджаныя за “тэрарызм” на 24 і 21 год адпаведна

13 студзеня, Позірк. 36-гадовыя муж і жонка Дзмітрый і Вольга Капузы прыгавораныя да 24 і 21 года пазбаўлення волі адпаведна, паведамляе праваабарончы цэнтр “Вясна”.

Адзначаюцца, што муж з жонкай родам з Драгічынскага раёна (Брэсцкая вобласць), жылі недалёка ад мяжы з Украінай. Ім інкрымінавалі арт. 289 (акт тэрарызму) і ч. 4 арт. 295 (незаконныя дзеянні ў дачыненні да агнястрэльнай зброі, боепрыпасаў і выбуховых рэчываў) Крымінальнага кодэкса.

“Таксама ім прызначылі буйныя штрафы. Сутнасць абвінавачвання невядомая. Суд праходзіў у закрытым рэжыме”, — паведамляюць праваабаронцы.

Улетку 2025 года мужа і жонкі ўнеслі ў “спіс тэрарыстаў”.

Пра затрыманне 16 студзеня 2024 года ў Драгічынскім раёне 12 чалавек паведамлялася ў прапагандысцкім фільме, які выйшаў на тэлеканале АНТ 1 красавіка таго ж года.

Сцвярджалася, што “тэрарысты” па заданні ўкраінскіх спецслужбаў нібыта атрымлівалі з-за мяжы выбухоўку і хавалі яе ў схованках. За гэта ім “плацілі гатоўкай”. У ліку затрыманых называліся Дзмітрый і Вольга Капузы, брат мужчыны Аляксандр і цёзка па прозвішчы Уладзімір.

Дзмітрый Капуза быў паказаны ў фільме кульгаючым, ён перасоўваўся з дапамогай кія. На кадрах адразу пасля затрымання ён прадэманстраваны ляжачым з акрываўленай нагой. Заяўлялася, што ў яго “давялося страляць”, бо ён “аказаў супраціў, спрабаваў уцячы і ўяўляў пагрозу для жыцця супрацоўнікаў КДБ”.

У тым жа фільме гаварылася пра затрыманне ў Маларыцкім раёне (Брэсцкая вобласць) Яўгена і Лідзіі Грукаў, а таксама Віктара Яскіча. Іх таксама абвінавацілі ў “тэрарызме”.