14 студзеня, Позірк. У цяперашні час няма неабходнасці адмяняць рэжым экстрэмальнай сітуацыі (ЭС), уведзены ўладамі Літвы праз беларускія метэазонды з цыгарэтамі, заявіў 14 студзеня міністр унутраных спраў балтыйскай дзяржавы Уладзіслаў Кандратовіч.
“Гэта дапамагае нам прымаць рашэнні, падключаючы вайскоўцаў, а войску патрабуецца наяўнасць такой сітуацыі”, — цытуе чыноўніка партал Delfi.
Паводле слоў Кандратовіча, рэжым ЭС “не стварае дадатковых нязручнасцяў насельніцтву, але дапамагае адпаведным чынам рэагаваць на сітуацыю”.
Аб перахопе першай сёлета партыі кантрабандных цыгарэт, дастаўленых з Беларусі з дапамогай двух паветраных шароў, паведамлялася 6 студзеня.
Паводле звестак Службы аховы дзяржаўнай мяжы Літвы (САДМ), у 2025 годзе было перахоплена 635 партый тытунёвых вырабаў, якія перапраўляліся з Беларусі ў Літву з дапамогай паветраных шароў; прымусова пасаджана 59 кантрабандысцкіх дронаў. Агулам летась памежнікі канфіскавалі 1,6 млн пачкаў цыгарэт, якія кантрабандысты перапраўлялі ў Літву дронамі і аэрастатамі.
Акрамя таго, у 2025 годзе супрацоўнікі САДМ затрымалі 171 чалавека, меркавана датычнага да кантрабанды паветраным шляхам.
9 снежня 2025 года ўрад Літвы абвясціў ЭС дзяржаўнага ўзроўню праз “гібрыдную атаку Беларусі”.
Рашэнне прынятае “ў сувязі з пагрозай нацыянальнай бяспецы дзяржавы і небяспекай для жыцця і здароўя людзей, а таксама для маёмасці і (або) навакольнага асяроддзя, стваранага тым, што на тэрыторыю Літвы з Беларусі запускаюцца паветраныя шары, якія перавозяць кантрабанду”.
Урад нагадаў, што з-за пагрозы, якую ствараюць для грамадзянскай авіяцыі паветраныя шары з кантрабандай, Вільнюсскі аэрапорт з кастрычніка быў закрыты ў агульнай складанасці больш за 60 гадзін. Праблема закранула больш за 350 рэйсаў, каля 51 тыс. пасажыраў.
Беларускі дэмакратычны лідар Святлана Ціханоўская падтрымала рашэнне Вільнюса, назваўшы яго вымушанай мерай у адказ на “апошнія правакацыі [Аляксандра] Лукашэнкі з выкарыстаннем кантрабандных паветраных шароў для парушэння працы грамадзянскай авіяцыі”.
