Ціханоўская правядзе шэраг палітычных сустрэч у швейцарскім Давосе
16 студзеня, Позірк. Беларускі дэмакратычны лідар Святлана Ціханоўская на наступным тыдні выступіць на Сусветным эканамічным форуме ў швейцарскім Давосе (19–23 студзеня), а таксама правядзе шэраг палітычных сустрэч.
Паводле інфармацыі з яе тэлеграм-канала, у цэнтры ўвагі будуць пытанні палітзняволеных, спынення рэпрэсій у Беларусі, шляхоў выхаду з палітычнага крызісу.
“Для мяне важна, каб тэма Беларусі гучала, каб нас адрознівалі ад Расіі, а беларусаў не прыраўноўвалі да рэжыму”, — заявіла Ціханоўская.
Выступаючы на форуме ў Давосе год таму, палітык заявіла, што сусветныя лідары часам “недаацэньваюць значэнне свабоднай і дэмакратычнай Беларусі ў пытаннях бяспекі”.
Паводле яе слоў, некаторыя людзі “не разглядаюць сітуацыю ў Беларусі і Украіне як адзінае цэлае, але гэта так”. Расія, адзначыла яна, не бачыць ні ва Украіне, ані ў Беларусі краіны, якія “могуць самі абіраць сваю будучыню”.
