Двое грамадзян Беларусі затрымана ў Тайландзе за нелегальную здачу ў пракат аўтамабіляў
18 студзеня, Позірк. Аб затрыманні ў турыстычнай правінцыі Пхукет (Тайланд) двух грамадзян Беларусі — мужчыны і жанчыны — паведамляе партал pattayapeople.ru.
Адзначаецца, што беларусы “вялі незаконную дзейнасць па здачы ў арэнду транспарту, выкарыстоўваючы мясцовых грамадзян як падстаўных асоб для абыходу законаў”.
Затрыманыя абвінавачваюцца ў “незаконным вядзенні дзейнасці, абмежаванай для замежнікаў, а таксама ў выкарыстанні тайскіх <…> асоб для нелегальнага ажыццяўлення камерцыйнай дзейнасці”.
“Затрыманне стала вынікам серыі дарожна-транспартных здарэнняў, у якіх удзельнічалі замежныя кіроўцы без сапраўдных вадзіцельскіх правоў. Расследаванне выявіла, што пара кіравала неліцэнзійным бізнесам па пракаце аўтамабіляў, выкарыстоўваючы тайскіх грамадзян у якасці фіктыўных партнёраў для абыходу заканадаўчых абмежаванняў”, — гаворыцца ў публікацыі.
Беларусы, як заяўляецца, “самастойна арганізоўвалі працэс арэнды і ажыццяўлялі збор плацяжоў, не патрабуючы пры гэтым ад кліентаў прад’яўлення сапраўднага пасведчання кіроўцы”.
“Падобная практыка стварала значныя рызыкі як для саміх кіроўцаў, так і для іншых удзельнікаў дарожнага руху, што ў выніку прывяло да шэрагу аварый і прыцягнула ўвагу мясцовых уладаў”, — падкрэслівае партал.
Паведамляецца аб правядзенні ператрусаў у пункце пракату аўтамабіляў і бухгалтарскай фірме, якая абслугоўвала бізнес беларусаў. Канфіскаваныя доказы “для далейшага разбіральніцтва”.
Пяцёра беларусаў і шасцёра расіян пацярпела ў выніку ДТЗ з аўтобусам у Тайландзе
8 лістапада, Позірк. Пяцёра беларусаў і шасцёра расіян пацярпела ў дарожна-транспартным здарэнні з аўтобусам на тэрыторыі гатэля ў раёне нацыянальнага парка Сай Ёк у Тайландзе, паведаміла 8 лістапада агенцтва ТАСС са спасылкай на загадчыка консульскага аддзела амбасады РФ Іллю Ільіна. …
