Трэці раз з пачатку года за суткі ад агню загінулі рэкордныя восем чалавек

18 студзеня, Позірк. За мінулыя дзяжурныя суткі (з 6:00 17 студзеня да 6:00 18 студзеня 2026 года) на пажарах у Беларусі загінула восем чалавек, сведчаць аператыўныя даныя Міністэрства па надзвычайных сітуацыях.

У Магілеўскім раёне ахвярамі агню сталаі чатыры чалавекі, у Гродзенскай вобласці — два (абодва ў Ваўкавыскім раёне), у Мінскай — таксама два (у Бярэзінскім і Вілейскім раёнах).

Восем ахвяр — рэкордная сутачная колькасць смерцяў ад агню сёлета. Раней столькі ж фіксавалася 16 і 13 студзеня.

Паводле звестак МНС, з пачатку 2026 года ў Беларусі адбылося 508 пажараў (+70,5% да аналагічнага перыяду 2025-га, калі было 298), ад агню загінула 70 чалавек (+59,1%; 44), траўмавана — 33 (+50%, 22), выратавана — 33 (+73,7%; 19).

Пры гэтым ведамства працягвае карэктаваць статыстыку смяротнасці ў бок змяншэння. Апошні такі выпадак зафіксаваны 17 студзеня.

Раней МНС тлумачыла перыядычную карэкціроўку даных тым, што часам пасля правядзення судова-медыцынскай экспертызы высвятляецца — смерць наступіла не праз пажар. Наадварот, як заяўляла ведамства, узгаранне часам можа ўзнікнуць пасля смерці чалавека.