У 2025 годзе на будаўніцтва Нацыянальнага гістарычнага музея выдаткавана 91 млн рублёў
Будаўніцтва новага будынка Нацыянальнага гістарычнага музея ў Мінску
19 студзеня, Позірк. У 2025 годзе на будаўніцтва Нацыянальнага гістарычнага музея быў выдаткаваны 91 млн рублёў (29,6 млн долараў паводле сярэднегадавога курсу Нацбанка), заявіў кіраўнік дырэкцыі па будаўніцтве аб’екта Максім Котаў 18 студзеня ў эфіры “Беларусь 1”.
Паводле яго слоў, “выдаткавана 86 мільёнаў (рублёў; 28 млн долараў. — “Позірк”.) са спецыяльнай праграмы рэспубліканскага бюджэту і каля 5 мільёнаў (1,6 млн долараў. — “Позірк”.) — з грошай суботніка”. “Усё пад поўным кантролем, не будзе ніякіх незаконных марнаванняў або разадзьмутых бюджэтаў”, — падкрэсліў спікер.
Як адзначана ў сюжэце, “працэс ужо прайшоў свой экватар” і “гатоўнасць аб’екта складае 65%”.
“Запраектавана дзевяць этапаў будаўніцтва, — адзначыў Котаў. — Тры першыя этапы выкананыя ў поўным аб’ёме. Звонку контур закрыты цалкам, маналітныя работы выкананыя цалкам, запушчана цяпло, аб’ект выграваецца, каб весці ўнутраныя работы”.
6 верасня 2024 года, Аляксандру Лукашэнку прадставілі канцэпцыю новага будынка музея на ўчастку паміж пр. Пераможцаў — вул. Арлоўскай і ракой Свіслач, то бок на месцы былога парку забаў “Дрымлэнд”.
Адзначалася, што ў экспазіцыю ўвойдуць экспанаты і інфармацыя пра гісторыю беларускіх зямель, пачынаючы са старажытных часоў і заканчваючы сучаснасцю.
У экспазіцыі, сказаў тады Лукашэнка, не павінна быць “ніякага нацыяналістычнага або ўра-патрыятычнага перахлёсту”. У ёй, на яго думку, трэба адлюстраваць “аб’ектыўны погляд” на беларускую гісторыю, “каб не толькі беларусы, але і іншыя народы маглі пагадзіцца з яе трактоўкай або, ва ўсякім разе, не маглі адпрэчыць і адмаўляць яе”.
ТАА “Парк забаў Дрымлэнд”, які працаваў з 2004 года, знаходзіцца ў працэдуры банкруцтва. Эканамічны суд Мінска прыняў да вытворчасці справу пра банкруцтва 29 студзеня 2024 года. Пазыкі парку на студзень гэтага года складалі больш за 1,85 млн рублёў, актывы ацэненыя ў 112,6 тыс. рублёў.
У жніўні 2023 года стала вядома, што на месцы “Дрымлэнда” адкрыюць “Парк народнага адзінства”.
У 2017 годзе Лукашэнку прэзентавалі ідэю пабудаваць новы будынак гістарычнага музея непадалёк ад стэлы на пр. Пераможцаў — праз дарогу ад Музея гісторыі Вялікай Айчыннай вайны.
СМІ паведамлялі, што этап праектавання планавалася завяршыць у 2019 годзе. Пачатак будаўніцтва быў намечаны на 2020 год. Крыніцай фінансавання работ павінны былі стаць сродкі як рэспубліканскага бюджэту, так і бюджэту сталіцы.
Цяпер галоўны будынак гістарычнага знаходзіцца на вул. Карла Маркса ў цэнтры сталіцы.
