Ціханоўская выказала спачуванні блізкім загінулых у чыгуначнай аварыі на поўдні Іспаніі

19 студзеня, Позірк. Шчырыя спачуванні сем’ям, якія страцілі сваіх блізкіх у чыгуначнай аварыі напярэдадні ўвечары на поўдні Іспаніі, выказала беларускі дэмакратычны лідар Святлана Ціханоўская.

“Мае думкі зараз з народам Іспаніі пасля жахлівай чыгуначнай катастрофы ў Адамузе, Кардова”, — напісала палітык на сваёй старонцы ў сацыяльнай сетцы Х.

18 студзеня ў 19:45 ля горада Адамуз у Андалусіі (непадалёк ад горада Кардова на поўдні Іспаніі) сутыкнуліся два высакахуткасныя цягнікі. Паводле даных іспанскіх уладаў, на якія спасылаецца ВВС, у выніку крушэння загінула сама меней 39 чалавек, дзясяткі атрымалі раненні.

Гэта найбуйнейшая чыгуначная катастрофа ў краіне за больш як дзесяцігоддзе. Цягнікі сышлі з рэек на прамым участку шляху, які нядаўна быў адрамантаваны.