20 студзеня, Позірк. За мінулыя дзяжурныя суткі (з 6:00 19 студзеня да 6:00 20 студзеня) ахвярамі агню ў Беларусі стала сем чалавек, сведчаць аператыўныя даныя Міністэрства па надзвычайных сітуацыях.
Два чалавекі загінула на пажары ў Гродзенскім раёне, па адным — у Пастаўскім (Віцебская вобласць), Чэрвеньскім (Мінская вобласць), Кобрынскім (Брэсцкая вобласць), Ельскім (Гомельская вобласць). Яшчэ адзін чалавек памёр у Асіповіцкім раёне (Магілёўская вобласць) — верагодна, у бальніцы, ад атрыманых раней траўмаў, бо напярэдадні ў гэтай мясцовасці пажараў не было.
Ад пачатку года ў Беларусі ад агню загінула 82 чалавекі — на 82,2%, або ў 1,82 раза, больш, чым за той жа перыяд 2025-га (45). За няпоўныя дзве дэкады ў краіне адбылося 625 пажараў (+88,8% да леташняга перыяду; 331), на якіх траўмаваны 41 чалавек (+57,7%; 26), выратаваны — таксама 41 (+95,2%; 21).
