Цеплазабеспячэнне Мінска цалкам адноўлена пасля аварыі — Мінэнерга
21 студзеня, Позірк. Цеплазабеспячэнне Мінска цалкам адноўлена пасля аварыі, паведамляе Міністэрства энергетыкі.
Завершаныя аднаўленчыя работы на пашкоджанай цепламагістралі, адзначае ведамства, “праведзеная замена выйшаўшага з ладу кампенсатара з кантролем якасці змантаванага вузла і паэтапна сістэма запоўненая цепланосбітам”.
Паведамляецца, што з моманту выяўлення пашкоджання ў працах было задзейнічана больш за 200 спецыялістаў, аварыйныя брыгады, паводле сцвярджэння Мінэнерга, працавалі кругласутачна.
Раніцай 21 студзеня першы намеснік генеральнага дырэктара-галоўны інжынер дзяржаўнага аб’яднання “Белэнерга” Юрый Шмакаў паведаміў, што цэласнасць цепламагістралі ў Мінску цалкам адноўленая.
Намеснік дырэктара ЖКГ № 1 Маскоўскага раёна Мінска Дзяніс Фёдараў паведаміў, што “цяпер працы ЖКГ для аднаўлення сістэм цеплазабеспячэння жылых дамоў завершаныя”. “Намі своечасова была арганізавана работа па разваздушванні сістэм ацяплення, выкананыя мерапрыемствы па аднаўленні тэмпературных рэжымаў у кватэрах спажыўцоў. Таксама своечасова апрацоўваюцца адзінкавыя заяўкі, якія паступаюць у дыспетчарскія службы”, — сказаў ён.
Аб аварыі на ўчастку цеплавой магістралі № 41 раніцай 19 студзеня паведаміла прадпрыемства “Мінскэнерга”. Адзначалася, што з-за гэтага “адбылося зніжэнне тэмпературы цепланосбіта часткі спажыўцоў” у пяці раёнах сталіцы.
Неўзабаве пасля таго як пра гэта стала вядома, намеснік начальніка ўпраўлення гарадской гаспадаркі і энергетыкі — начальнік аддзела энергетыкі гэтага ўпраўлення Мінгарвыканкама Андрэй Садоўскі заявіў, што тэмпература цепланосбіта ў цепласяцях “на працягу пары гадзін” будзе паднята “да нармаваных значэнняў”, “праблема будзе ліквідавана”.
Бліжэй да вечара міністр энергетыкі Дзяніс Мароз паведаміў, што “ў 17:21 водны рэжым быў адноўлены і былі ўключаны цыркуляцыйныя помпы для падачы цяпла”, спецыялісты пачалі “запускаць цеплазабеспячэнне ў дамах”.
Чыноўнік дэталізаваў падзеі, якія адбыліся ў 3:30 ночы 19 студзеня: “Пры тэмпературы паветра мінус 21 градус на адной з магістраляў, якія сілкуюць Мінск цеплавой энергіяй ад ЦЭЦ-4, быў пашкоджаны кампенсатар дыяметрам 1.200 мм”.
У выніку было парушана цеплазабеспячэнне больш як 3 тыс. дамоў. Паводле міністра, дзякуючы ўзаемадзеянню энергетыкаў, органаў мясцовай улады, МНС і ЖКГ былі аператыўна запушчаны раённыя кацельні, якія забяспечылі часовае цеплазабеспячэнне для “львінай долі” пацярпелых спажыўцоў.
Аднак, сказаў Мароз, аварыя прывяла да страты каля 5 тыс. куб. м цёплай вады, з прычыны чаго адзін магістральны цеплаправод быў часткова спустошаны. З-за гэтага цеплазабеспячэнне для часткі спажыўцоў не ўдалося аднавіць у кароткія тэрміны.
