За паўгода колькасць вёсак, якія абслугоўваюцца аўталаўкамі Белкаапсаюза, зменшылася на 1 тысячу

21 студзеня, Позірк. Доля магазінаў сістэмы Белкаапсаюза ў рознічным тавараабароце краіны складае 2,4%. Пра гэта прадстаўнікі арганізацыі паведамілі 21 студзеня дзяржСМІ.

Пад маркай Белкаапсаюза працуе найбольшая колькасць рознічных крам у Беларусі — 4,1 тыс., аднак каля 3 тыс. з іх знаходзяцца на вёсцы, маючы невялікую гандлёвую плошчу. З-за гэтага, як адзначаецца, па аб’ёме тавараабароту арганізацыю апярэджвае найбуйнейшая прыватная сетка — кампанія “Еўрагандаль” (брэнды “Еўраопт”, “Хіт!” і “Грошык”), у якой больш за 1,1 тыс.

У арганізацыі таксама паведамілі, што на яе прыпадае 20% усіх сацыяльных скідак, якія прадстаўляюцца ў краіне, у сувязі з чым “спажыўкааперацыя не можа ў поўнай меры ўжываць рынкавыя ўмовы гаспадарання”.

Пры гэтым аўталаўкі Белкаапсаюза працуюць “нават у тых месцах, дзе гэта не вельмі выгадна”. Зараз зона абслугоўвання аўтакрам спажыўкааперацыі (усяго іх 482) налічвае 12,8 тыс. вёсак з насельніцтвам больш за 442 тыс. чалавек. У іх ліку і невялікія населеныя пункты: у кожным трэцім — не больш за 10 жыхароў.

На прэс-канферэнцыі 9 ліпеня мінулага года старшыня праўлення Белкаапсаюза Інэса Караткевіч адзначала, што на прадпрыемствы арганізацыі прыпадае менш за 3% гандлёвага абароту краіны. Тады таксама заяўлялася, што з улікам таго, што ў ёй абслугоўваюцца ў асноўным пажылыя людзі, па іх лініі ажыццяўляецца больш за 20% прадастаўляемых у Беларусі гандлёвых скідак для ўразлівых катэгорый грамадзян.

На той час структура спажыўкааперацыі ў галіне гандлю ахоплівала 23 тыс. населеныя пункты Беларусі і ўключала ў сябе больш за 4 тыс. стацыянарных гандлёвых аб’ектаў і 482 аўтамагазіны.

Паводле звестак Караткевіч, аўтамагазіны абслугоўвалі 13,8 тыс. населеных пунктаў, амаль 6 тыс. з іх былі маланаселеныя — там пражывала не больш за 10 чалавек.

Такім чынам, з прыведзенай статыстыкі вынікае, што колькасць населеных пунктаў, якія абслугоўваюцца аўтакрамамі, за паўгода знізілася на адну тысячу, прычым за кошт маланаселеных вёсак.

26 жніўня летась Аляксандр Лукашэнка на нарадзе аб эфектыўнасці сістэмы гандлёвага абслугоўвання насельніцтва заявіў, што Белкаапсаюзу неаднаразова выдзялялася дзяржаўная падтрымка, у прыватнасці, на паліва для аўталавак.

“Калі вы і далей плануеце так арганізоўваць гандаль Белкаапсаюза, гэта вам будзе сур’ёзны мінус. Мы што, паліва павінны для гандлю закупляць? Гэтых “цудаў” яшчэ не было. <…> Калі мы будзем ім дапамагаць, іх ад гэтай “соскі” не адарвеш. Навошта ім працаваць? Добра жывуць”, — раскрытыкаваў арганізацыю прамоўца.

Лукашэнка адзначыў таксама скарачэнне гандлёвых аб’ектаў Белкаапсаюза на вёсцы: год таму іх доля ў агульным аб’ёме такіх аб’ектаў складала амаль 25%, цяпер — каля 23%. “Такімі тэмпамі вы страціце ўсю сваю гандлёвую сетку, у якой пакуль яшчэ можаце збываць прадукцыю, якая вырабляецца вамі”, — папярэдзіў ён.

На нарадзе была адзначана “адсутнасць станоўчых зрухаў у фінансавых патоках ад гандлёвай дзейнасці Белкаапсаюза”, страты арганізацыі дасягнулі 33 млн рублёў (каля 11,1 млн долараў).

У кастрычніку 2024 года Саўмін распарадзіўся даць у 2024–2026 гадах “Беларусбанку” і “Белаграпрамбанку” гарантыі па пагашэнні асноўнага доўгу па крэдытах, якія выдаюцца на тэрмін да аднаго года арганізацыям Белкаапсаюза.

Крэдыты павінны пайсці на разлікі арганізацый з беларускімі таваравытворцамі, створанымі імі ўнітарнымі прадпрыемствамі, арганізацыямі, якія ўваходзяць у склад холдынгаў з удзелам дзяржавы.

19 сакавіка 2024-га Раман Галоўчанка, які займаў тады пасаду прэм’ер-міністра, на нарадзе аб мерах падтрымкі спажыўкааперацыі, заявіў, што “сітуацыя ў Белкаапсаюзе досыць складаная, усе віды дзейнасці, што ажыццяўляецца, акрамя нарыхтоўчай і вытворчасці, стратныя”.

Белкаапсаюз — гэта “ўнікальная структура, і страціць яе нельга”, заявіў 16 лютага 2024 года Лукашэнка на агульным сходзе арганізацыі. Паведамлялася, што ён зрабіў акцэнт на аўтакрамах.

Структура атрымлівае падтрымку дзяржавы на працягу апошніх дзесяцігоддзяў. Пры гэтым у арганізацыі прызнавалі, што прадаўцы, якія працуюць у ёй — пераважна пенсійнага ўзросту, што абцяжарвае ўкараненне аўтаматызацыі працэсаў гандлю.