Мытня атрымала права правяраць у замежных перавозчыкаў дазвол на праезд у ведамасных пунктах афармлення

23 студзеня, Позірк. Супрацоўнікі мытных органаў змогуць правяраць у замежных перавозчыкаў дазвол на праезд па тэрыторыі Беларусі не толькі ў пунктах пропуску на мяжы, але і ў ведамасных пунктах афармлення. Гэта вынікае з указа № 31, які 22 студзеня падпісаў Аляксандр Лукашэнка.

Мытнікі будуць кантраляваць выкананне міжнародных аўтаперавозак, у тым ліку “на аснове дазволаў, якія выдаюцца ў адпаведнасці з міжнароднымі дамовамі”, удзельніцай якіх з’яўляецца Беларусь.

Акрамя таго, супрацоўнікі Дзяржмыткамітэта будуць сачыць за праездам вялікагрузных і буйнагабарытных аўтамабіляў па тэрыторыі краіны, а таксама адпаведнасцю іх вагавых і іншых параметраў дапушчальным нормам.

Указ распаўсюджваецца на аўтамабілі, зарэгістраваныя за мяжой і імпартныя тавары, якія перавозяць у Беларусь з тэрыторыі дзяржаў — членаў Еўразійскага эканамічнага саюза і месцам разгрузкі якіх паводле дакументаў з’яўляецца Беларусь.