Колькасць грамадзян еўрапейскіх краін, якія ўехалі за тыдзень у Беларусь, амаль не змянілася

26 студзеня, Позірк. З 19 па 26 студзеня ў бязвізавым парадку ў Беларусь уехала 2.295 грамадзян еўрапейскіх дзяржаў (тыднем раней — 2.274), сведчыць праведзены “Позіркам” аналіз даных Дзяржаўнага пагранічнага камітэта.

За апошні тыдзень у Беларусь прыбыло 767 грамадзян Літвы (726), 679 грамадзян і неграмадзян Латвіі (747), 525 грамадзян Польшчы (480), 324 грамадзяніны іншых еўрапейскіх дзяржаў са спісу пашыранага бязвізу (321).

Агулам з 15 красавіка 2022 года Беларусь наведаў 1.265.991 жыхар Еўропы. З Латвіі прыбылі 407.274 замежнікі, з Літвы — 665.141, з Польшчы — 134.241. У рамках пашыранага бязвізу для 35 еўрапейскіх дзяржаў з 19 ліпеня 2024 года ў Беларусь уехала 59.335 чалавек.

Бязвізавы рэжым дзейнічае з 15 красавіка 2022 года для жыхароў Латвіі і Літвы, з 1 ліпеня таго ж года — Польшчы. 19 ліпеня 2024 года беларускія ўлады распаўсюдзілі бязвізавы рэжым на грамадзян яшчэ 35 краін Еўропы.

9 снежня 2025 года Аляксандр Лукашэнка падоўжыў бязвізавы ўезд для грамадзян 38 еўрапейскіх краін да 31 снежня 2026 года ўключна.

Пашыраны бязвіз тычыцца жыхароў Андоры, Аўстрыі, Бельгіі, Балгарыі, Босніі і Герцагавіны, Ватыкана, Венгрыі, Вялікабрытаніі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Люксембурга, Ліхтэнштэйна, Мальты, Манака, Нарвегіі, Нідэрландаў, Партугаліі, Паўночнай Македоніі, Румыніі, Сан-Марына, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі.

Большасць гэтых краін рэжым Лукашэнкі лічыць “недружалюбнымі” за тое, што ўвялі санкцыі альбо далучыліся да іх.