У 2025 годзе на рынку Беларусі з’явілася больш за 50 новых лекаў — Мінздароўя

26 студзеня, Позірк. На беларускі фармацэўтычны рынак у 2025 годзе было выведзена больш за 50 новых лекавых прэпаратаў, паведаміў дзяржСМІ начальнік аддзела навукі Міністэрства аховы здароўя Васіль Філанюк.

Паводле інфармацыі чыноўніка, частка навінак — айчынныя распрацоўкі. Навукоўцы Нацыянальнай акадэміі навук зарэгістравалі шэсць новых лекавых прэпаратаў і фармацэўтычных субстанцый, а таксама восем арыгінальных тэст-сістэм для імунаферментнага аналізу.

У кастрычніку 2025 года Мінздароўя паведамляла, што гадавы аб’ём вытворчасці па выніках 2024-га склаў амаль 2,5 млрд рублёў, а ў 2026-м плануецца выпусціць фармацэўтычнай прадукцыі больш як на 3 млрд.

Адзначалася, што беларускія лекі займаюць каля 50% унутранага рынку ў вартасным выражэнні, а ў аб’ёмах спажывання ва ўмоўных упакоўках беларускія прэпараты займаюць 65% у аптэчнай сетцы і звыш 80% у бальніцах.

Айчынныя аналагі прэпаратаў у тры разы таннейшыя за імпартныя, гаварылася ў паведамленні.

За апошнія пяць гадоў, як сцвярджалася, у Беларусі распрацавана каля 400 новых прэпаратаў.

5 студзеня 2026 года член калегіі (міністр) па канкурэнцыі і антыманапольным рэгуляванні Еўразійскай эканамічнай камісіі Максім Ермаловіч заявіў, што агульнага рынку лекавых сродкаў у ЕАЭС на гэты момант няма.

Аналагічныя прэпараты ў адным і тым жа дазаванні ў розных краінах могуць мець розніцу ў кошце да шасці разоў, падкрэсліў ён, што “з пункту гледжання антыманапольнага рэгулявання дастаткова складана патлумачыць”.