За суткі на пажарах загінула сем чалавек, за месяц — 129

1 лютага, Позірк. За мінулыя дзяжурныя суткі (з 6.00 31 студзеня да 6.00 1 лютага 2026 года) на пажарах у Беларусі загінула сем чалавек, сведчаць аператыўныя даныя Міністэрства па надзвычайных сітуацыях.

31 студзеня раніцай паступіла паведамленне аб пажары ў жылым доме ў в. Якубовічы Шчучынскага раёна Гродзенскай вобласці. На пажары знойдзены загінулы гаспадар 1981 года нараджэння.

Уначы зафіксаваны пажар у жылым доме ў в. Казлы Докшыцкага раёна Віцебскай вобласці. Знойдзены загінулы гаспадар 1968 года нараджэння і грамадзянін і грамадзянка, якія знаходзіліся ў гасцях.

Таксама паступіла паведамленне аб пажары ў жылым доме ў пас. Уборак Асіповіцкага раёна Магілёўскай вобласці. На пажары знойдзены два загінуўшыя чалавекі.

Пазней адзначаны пажар са смяротным зыходам у жылым доме ў аг. Юравічы Калінкавіцкага раёна Гомельскай вобласці.

З пачатку 2026 года на пажарах у Беларусі загінула 129 чалавек — у 1,95 раза больш, чым за той жа перыяд 2025-га (66), сведчыць праведзены “Позіркам” аналіз аператыўных дадзеных Міністэрства па надзвычайных сітуацыях.

Колькасць пажараў у гадавым вымярэнні павялічылася ў 1,93 раза — з 507 да 980.

За студзень гэтага года на пажарах траўміравана 87 чалавек (у 2,07 раза больш у параўнанні з аналагічным леташнім перыядам, калі было 42), выратаваны — 61 (у 1,5 раза больш; 42).

Такім чынам з пачатку года захоўваецца высокая смяротнасць на пажарах. Сутачны рэкорд — восем чалавек (13, 16 і 18 студзеня).

Пры гэтым дадзеныя за мінулыя перыяды перыядычна карэктуюцца. Раней МНС тлумачыла гэта тым, што часам пасля правядзення судова-медыцынскай экспертызы высвятляецца – смерць наступіла не з-за пажару. Наадварот, як заяўляла ведамства, узгаранне часам можа ўзнікнуць пасля смерці чалавека.