Жыхар Гомеля выдаваў за акаўнт міліцыі сваю старонку ў “ЦікТоку“, спадзеючыся на хуткую манетызацыю

5 лютага, Позірк. Фальшывы акаўнт беларускай міліцыі ў сацыяльнай сетцы “ЦікТок” выявіла Галоўнае ўпраўленне ўласнай бяспекі Міністэрства ўнутраных спраў па Мінску.

Паводле звестак прэс-службы МУС, уладальнікам профілю выявіўся 19-гадовы жыхар Гомеля, які для напаўнення несапраўднай старонкі міліцыі браў кантэнт з афіцыйных міліцэйскіх крыніц.

Як сцвярджаецца, малады чалавек прызнаўся, што хацеў прыцягнуць як мага больш падпісчыкаў (на момант выяўлення іх было амаль 3,3 тыс.), а пасля “перайменаваць старонку і манетызаваць, каб набыць аўтамабіль BMW”.

Праводзіцца праверка, дзеянням гамяльчаніна “будзе дадзеная прававая ацэнка”.