Мытня спыніла спробу незаконнага ўвозу мяча ў Беларусь

9 лютага, Позірк. Мінскія мытнікі канфіскавалі меч, які спрабаваў незаконна завезці ў Беларусь перавозчык з Казахстана, вынікае з паведамлення Дзяржаўнага мытнага камітэта (ДМК).

Ведамства называе гэтую зброю шабляй, аднак на фота — класічная японская катана.

Паводле інфармацыі ДМК, перавозчык перадаў суправаджальныя дакументы для афармлення зборнага грузу, у які ўваходзілі тэкстыльныя вырабы, аўтазапчасткі, электрычныя прыборы ды іншае. Пра меч у іх нічога не гаварылася.

Мытная лабараторыя, на экспертызу якой быў накіраваны прадмет, вызначыла, што меч выраблены “завадскім спосабам і з’яўляецца клінкавай зброяй рубяшча-рэжучага і колюча-рэжучага дзеяння”. Халодную зброю ўвозіць у Беларусь без дазволу нельга.

Мінская рэгіянальная мытня распачала адміністрацыйны працэс паводле ч. 1 арт. 15.5 КаАП (недэклараванне тавараў, якія трапляюць пад мытнае дэклараванне). Санкцыя гэтай часткі артыкула — ад 5 да 30 базавых велічынь (ад 225 да 1.350 рублёў), акрамя таго, магчымая канфіскацыя незадэклараваных тавараў.

Зброя канфіскаваная да рашэння суда.