У рамках праверкі ў баявую гатоўнасць упершыню прыведзена адразу некалькі часцей — Вальфовіч

10 лютага, Позірк. Чарговы этап праверкі Узброеных сіл, які распачаўся 10 лютага, “характарызуецца раптоўнасцю, комплекснасцю і шырынёй выканання пастаўленых задач, а таксама маштабнасцю”, паведаміла Міністэрства абароны са спасылкай на дзяржсакратара Савета бяспекі Аляксандра Вальфовіча.

“Калі раней мы правяралі паслядоўна адну вайсковую часць за другой, то цяпер распараджэнні прэзідэнта ўручаныя шэрагу вайсковых часцей Заходняга і Паўночна-Заходняга аператыўных камандаванняў, некалькім вайсковым часцям і злучэнням сіл спецыяльных аперацый”, — адзначыў ён.

Паводле слоў Вальфовіча, “будуць адпрацаваныя пытанні прывядзення вайсковых часцей, якія ўваходзяць у камплект сіл неадкладнага рэагавання, у баявую гатоўнасць у штатах мірнага часу”. Акрамя таго, пройдзе праверка “загрузкі запасаў матэрыяльных сродкаў, сродкаў узбраення, здзяйснення маршаў у прызначаныя раёны і на названыя рубяжы, у тым ліку ля дзяржаўнай мяжы”.

Чыноўнік паведаміў, што “ў ходзе выканання задач будуць адпрацаваныя пытанні процідзеяння дыверсійна-выведніцкім групам праціўніка”. Пасля прыбыцця ў “прызначаныя раёны, на названыя рубяжы” будзе арганізаваная “сістэма інжынерных загарод”, а таксама “адпрацаваныя пытанні вядзення абарончага бою”.

“Пасля адпрацоўкі тактычных эпізодаў ва ўмовах уздзеяння дыверсійна-выведніцкіх груп праціўніка злучэння і вайсковыя часці вернуцца на палігоны, дзе з імі будуць праведзеныя кантрольныя заняткі па агнявой і фізічнай падрыхтоўцы”, — паведаміў дзяржсакратар Савета бяспекі.

Пра завяршэнне першага этапа праверкі боегатоўнасці арміі, якая праводзіцца на падставе распараджэння Аляксандра Лукашэнкі, Вальфовіч заявіў 1 лютага ў эфіры тэлеканала “Беларусь 1”.

Чыноўнік адзначыў, што мерапрыемствы праходзілі “ў няпростых умовах”, верагодна, маючы на ​​ўвазе ўстойлівыя маразы.

Асабовы склад, паводле яго слоў, “пастаўленай задачы даў рады”, паказаўшы “станоўчы вынік”.

Паводле сцвярджэння Вальфовіча, Лукашэнка штодня кантраляваў ход праверкі, “карэктаваў” і асабіста даваў указанні.

Днём пазней, 2 лютага, Мінабароны паведаміла, што ў рамках “нарошчвання мерапрыемстваў комплекснай праверкі баявой гатоўнасці” Узброеных сіл была прыведзеная ў “гатоўнасць да выканання задач па прызначэнні” адна з вайсковых часцей Заходняга аператыўнага камандавання.

Раптоўная праверка боегатоўнасці распачалася 16 студзеня. Тады Вальфовіч заявіў, што яна праводзіцца паводле новай сістэмы: ён асабіста — у абыход міністра абароны — уручыў камандзіру адной з мехбрыгад распараджэнне прывесці вайсковую часць у баявую гатоўнасць.

26 студзеня Лукашэнка анансаваў, што праверка будзе праходзіць да вясны.

У той жа дзень міністр абароны Віктар Хрэнін абвясціў пра пачатак яшчэ адной праверкі боегатоўнасці вайсковых часцей і падраздзяленняў — планавай.