Бяляцкі абмеркаваў сітуацыю з правамі чалавека ў Беларусі ў нарвежскім парламенце
Алесь Бяляцкі падчас візіту ў Нарвегію
10 лютага, Позірк. Удзел у мерапрымствах нарвежскага парламента (Стортынга) узяў 10 лютага старшыня праваабарончага цэнтра “Вясна”, лаўрэат Нобелеўскай прэміі міру 2022 года Алесь Бяляцкі.
Паводле інфармацыі “Вясны”, Бяляцкі сустрэўся са старшынёй парламента Масудам Гарахані і дэлегацыяй Парламенцкай асамблеі АБСЕ, падчас сустрэчаў асноўная ўвага была нададзеная сітуацыі з правамі чалавека ў Беларусі.
Паведамляецца, што Гарахані падкрэсліў важнасць асабістай сустрэчы з беларускім праваабаронцам, які, “нягледзячы на велізарныя асабістыя цяжкасці, не адступіў ні на крок у сваёй барацьбе за правы чалавека і дэмакратыю ў Беларусі”.
Падчас перамоваў асобна абмяркоўвалася сітуацыя з палітычнымі зняволенымі, якая, паводле кіраўніка дэлегацыі Стортынга ў Парламенцкай асамблеі АБСЕ Марыуса Арыён Нільсана, “застаецца вострай”. Нільсан адзначыў, што ў Беларусі па-ранейшаму шмат палітычных зняволеных. “І для нас важна атрымаць ўяўленне пра іх становішча”, — падкрэсліў ён.
Запрашэнне Бяляцкаму накіравала дэлегацыя Стортынга ў АБСЕ. У сустрэчы таксама ўзялі ўдзел сябры дэлегацыі Стортынга ў Парламенцкай асамблеі Савета Еўропы (ПACE).
Алесь Бяляцкі, яго намеснік і віцэ-прэзідэнт Міжнароднай федэрацыі за правы чалавека (FIDH) Валянцін Стэфановіч і каардынатар кампаніі “Праваабаронцы за свабодныя выбары“ Уладзімір Лабковіч былі затрыманыя 14 ліпеня 2021 года. 3 сакавіка 2023 года ў рамках палітычна матываванай справы аб “кантрабандзе грошай“ і “фінансаванні парушэння грамадскага парадку“ яны былі прысуджаныя да 10, 9 і 7 гадоў зняволення адпаведна.
Бяляцкі і Лабковіч былі вызваленыя 13 снежня мінулага года, Лабковіч адпраўлены ва Украіну, Бяляцкі — вывезены ў Літву. 13 снежня 2025 года ў рамках дамоўленасцяў паміж Мінскам і Вашынгтонам Лукашэнка вызваліў 123 чалавекі (110 грамадзян Беларусі і 13 замежнікаў) з умовай іх наступнага ад’езду з краіны. 109 беларусаў і пяць украінцаў прыбылі на тэрыторыю Украіны праз пункты пропуску Новая Гута / Новыя Ярылавічы, праз якія Украіна і Расія звычайна праводзяць абмен палоннымі.
7 кастрычніка 2022 года Нобелеўскі камітэт атрымаў прэмію міру праваабаронцаў з трох краін: Беларусі, Украіны і Расіі. Узнагароду атрымалі Бяляцкі, які на той момант знаходзіўся ў зняволенні, Украінскі цэнтр грамадзянскіх свабод і расійскі праваабарончы цэнтр “Мемарыял“.
