Урад можа атрымаць паўнамоцтвы рэгуляваць праваадносіны для засялення грамадзян у арэнднае жыллё

11 лютага, Позірк. На грамадскае абмеркаванне вынесены праект закона “Аб змяненні Кодэкса Рэспублікі Беларусь аб архітэктурнай, горадабудаўнічай і будаўнічай дзейнасці”, паведамляе Нацыянальны прававы інтэрнэт-партал.

У дакуменце прапануецца, у прыватнасці, пры ажыццяўленні архітэктурнай дзейнасці прадугледзець магчымасць ствараць і выкарыстоўваць аб’екты аўтарскага права (праектная дакументацыя ў выглядзе чарцяжоў, макетаў, тэкстаў і малюнкаў).

Для горадабудаўнічых праектаў агульнага і дэталёвага планавання прапануецца ўвесці адзіную норму аб уключэнні звестак аб археалагічных аб’ектах, воінскіх пахаваннях і пахаваннях ахвяр войнаў у населеных пунктах і на прыгарадных тэрыторыях.

Урад можа атрымаць паўнамоцтвы па рэгуляванні праваадносін для засялення грамадзян у арэнднае жыллё (цяпер іх маюць Аляксандр Лукашэнка і мясцовыя органы ўлады), Мінбудархітэктуры — функцыю заказчыка па распрацоўцы генеральных планаў населеных пунктаў з колькасцю насельніцтва больш за 20 тыс. чалавек і аграгарадкоў.

Плануецца выключыць неабходнасць падрыхтоўкі і выдачы зацікаўленым асобам атэстатаў адпаведнасці і кваліфікацыйных атэстатаў на бланках з пэўнай ступенню абароны.

Арганізатар грамадскага абмеркавання — Міністэрства архітэктуры і будаўніцтва. Заўвагі і прапановы можна выказаць у спецыяльнай тэме на Прававым форуме Беларусі з 10 па 20 лютага.

Дзейны кодэкс быў прыняты ў ліпені 2023 года, а праз год быў ужо зменены.

Былі спрошчаныя патрабаванні па атрыманні дазвольнай дакументацыі на будаўніцтва, значна пашыраны пералік выпадкаў, пры якіх яна не патрабуецца. У прыватнасці, гэта датычыцца тэхнічнай мадэрнізацыі і рамонту аб’ектаў; зносу фізічнымі асобамі нежылых капітальных пабудоў на прадастаўленых зямельных участках; будаўніцтва ў мэтах ліквідацыі альбо папярэджання аварыйных і надзвычайных сітуацый; ўзвядзення садовых дамоў, гаспадарчых пабудоў і інш.