У Брэсце загінуў падлетак — меркавана ўпаў з вялікай вышыні, у сацсетках паведамляюць пра суіцыд
Брэст
17 лютага, Позірк. Пра гібель у Брэсце падлетка дзяржСМІ паведаміў прадстаўнік Следчага камітэта Раман Зармаеў.
Цела падлетка было знойдзена 10 лютага ў двары аднаго з жылых дамоў.
Паводле слоў Зармаева, на месцы здарэння працавала следча-аператыўная група. На целе падлетка выяўлены “траўмы, характэрныя для падзення з вышыні”.
Супрацоўнікамі СК праводзіцца “комплекс следчых і працэсуальных дзеянняў, накіраваных на ўстанаўленне ўсіх абставінаў трагедыі”, сказаў Зармаеў.
Раней са спасылкай на каментарыі ў сацсетках паведамлялася, што ў Брэсце загінуў 10-класнік адной са школ горада. Ён нібыта скочыў з даху 20-павярховага дома. Верагодная прычына суіцыду — цкаванне ў школе.
У 2025 годзе ад знешніх прычын загінула 110 дзяцей, паведаміла на прэс-канферэнцыі 17 лютага ў Мінску старшы пракурор Упраўлення па наглядзе за выкананнем заканадаўства аб непаўналетніх і моладзі Генеральнай пракуратуры Аксанa Кірэйчык.
Для параўнання: у 2024 годзе ад знешніх прычын загінула 126 дзяцей. Такім чынам, за год паказчык знізіўся на 12,7%.
У 2024 годзе ад знешніх прычын у краіне загінула на 34% больш, чым у 2023-м (94). Асноўныя прычыны гібелі — суіцыд, дарожна-транспартныя здарэнні, утапленні і пажары.
