Лукашэнка забараніў непаўналетнім удзельнічаць у электронных імгненных латарэях

20 лютага, Позірк. Указ №64 “Аб удасканаленні латарэйнай дзейнасці” падпісаў 20 лютага Аляксандр Лукашэнка, паведаміла яго прэс-служба.

Дакумент прыняты “ў мэтах узмацнення абароны непаўналетніх і іншых сацыяльна неабароненых катэгорый грамадзян” і карэктуе ўказ Лукашэнкі ад 4 траўня 2007 года № 209 “Аб латарэйнай дзейнасці на тэрыторыі Рэспублікі Беларусь”.

Указам №64 устанаўліваецца забарона на ўдзел у электронных імгненных латарэях асоб, якія не дасягнулі 18 гадоў, і тых, хто абмежаваны ў наведванні ігральных устаноў, віртуальных ігральных устаноў і ўдзеле ў азартных гульнях.

Адначасова з гэтым вызначаны механізм адмовы банкамі названым асобам у правядзенні аперацый, звязаных з аплатай латарэйных ставак, а таксама ўводзіцца патрабаванне аб папаўненні ігравога рахунку ўдзельніка латарэі толькі ў безнаяўнай форме.

5 студзеня прэс-служба ўрада паведаміла, што ўладальнікі віртуальных казіно павінны мець на спецыяльным рахунку суму, эквівалентную не менш як 90 тыс. базавых велічынь (у 2026 годзе гэта 4 млн 50 тыс. рублёў). Такое патрабаванне змяшчаецца ў пастанове Савета міністраў “Аб парадку ажыццяўлення дзейнасці ў сферы ігральнага бізнесу”.

Дакумент падрыхтаваны “ў мэтах прывядзення заканадаўства ў адпаведнасць з указам <…>; ад 6 чэрвеня 2025 года № 226 “Аб дзейнасці ў сферы ігральнага бізнесу”.

Пры арганізацыі або правядзенні толькі букмекерскіх анлайн-гульняў або анлайн-гульняў таталізатара трэба мець суму, эквівалентную 20 тыс. базавых велічынь (900 тыс. рублёў).

Пастанова набывае моц 11 сакавіка 2026 года.