Пачасціліся выпадкі адмовы грамадзянам Беларусі ва ўездзе ў Ізраіль, беларуская амбасада апублікавала рэкамендацыі

23 лютага, Позірк. Аб пачашчэнні выпадкаў адмовы грамадзянам Беларусі ва ўездзе ў Ізраіль паведаміла беларуская амбасада ў гэтай краіне.

У сувязі з гэтым дыпмісія апублікавала шэраг рэкамендацый “для беларускай грамадскасці па тэматыцы паездак у Ізраіль”.

Перад паездкай неабходна аформіць дазвол праз сістэму абавязковага папярэдняга паведамлення (ETA-IL) Упраўлення па справах рэгістрацыі насельніцтва і іміграцыі Ізраіля. Дазвол не з’яўляецца гарантыяй уезду, а пацвярджае права на прыбыццё да пункта пропуску. Канчатковае рашэнне аб допуску на тэрыторыю Ізраіля прымае пагранічная служба.

Пры запаўненні анкеты неабходна дакладна ўказваць усе звесткі. Любыя разыходжанні паміж раней прадстаўленай інфармацыяй і адказамі пры праходжанні памежнага кантролю могуць пацягнуць адмову ва ўездзе.

Працаваць у Ізраілі можна толькі пры наяўнасці адпаведнай рабочай візы. Спробы выкарыстоўваць турыстычную паездку для пошуку працы або наступнага працаўладкавання “з’яўляюцца адной з асноўных прычын адмоваў ва ўездзе“, падкрэслівае амбасада.

Варта таксама ўлічваць, што ізраільскія органы бяспекі аналізуюць інфармацыю комплексна, у тым ліку адкрытыя крыніцы. Публічныя звесткі аб намеры працаўладкавацца або доўга пражываць у Ізраілі могуць стаць падставай для дадатковых праверачных мерапрыемстваў.

Рэкамендуецца загадзя падрыхтаваць пацверджанне браніравання і аплаты пражывання, зваротны квіток, медыцынскую страхоўку, дастатковыя фінансавыя сродкі на ўвесь тэрмін знаходжання, а таксама дакладна ведаць мэта паездкі, маршрут і тэрміны знаходжання ў краіне. У выпадку прыватнага візіту мэтазгодна мець пісьмовае запрашэнне прымаючага боку, копію пасведчання асобы і кантактныя дадзеныя запрашаючага асобы.

Ізраільскія памежныя органы маюць права праводзіць сумоўе для ўдакладнення мэты візіту, месца пражывання, крыніц даходу, наяўнасці сталай працы або вучобы, іншых устойлівых сацыяльных і эканамічных сувязяў з Беларуссю. Таму рэкамендуецца пацвердзіць наяўнасць такіх сувязяў (даведка з месца працы, пацверджанне навучання, дакументы аб уласнасці, звесткі аб сямейным становішчы і інш.).

Калі грамадзянін раней знаходзіўся ў Ізраілі блізка да максімальна дапушчальнага тэрміну і неўзабаве паўторна плануе ўезд, гэта можа выклікаць дадатковыя пытанні адносна рэальнай мэты знаходжання.

Падкрэсліваецца, што прадастаўленне недакладнай інфармацыі, супярэчлівыя адказы, утойванне сапраўдных намераў або адмова ад супрацоўніцтва з пагранічнай службай, як правіла, прыводзяць да адмовы ва ўездзе.

У выпадку паездкі да грамадзяніна Ізраіля альбо да асобы, якая знаходзіцца ў працэсе атрымання статусу (Грамадзянства, натуралізацыі і да т.п.), могуць прымяняцца дадатковыя дазвольныя працэдуры.

Для паломніцкіх паездак рэкамендуецца звяртацца ў паломніцкі аддзел Мінскай епархіі або паломніцкі аддзел Рускай духоўнай місіі ў Ізраілі.

Амбасада перасцерагае ад карыстання паслугамі пасярэднікаў, якія прапануюць гарантаваны ўезд альбо працаўладкаванне пад выглядам турыстычнай паездкі, і падкрэслівае, што наяўнасць зваротных квіткоў і пацверджанага пражывання само па сабе не з’яўляецца гарантыяй пропуску на тэрыторыю краіны.

Пагадненне аб бязвізавых паездках паміж Беларуссю і Ізраілем прадугледжвае магчымасць знаходжання грамадзян Беларусі на тэрыторыі гэтай краіны да 90 дзён на працягу кожнага перыяду 180 дзён без афармлення візы.

8 студзеня авіякампанія “Белавія” аднавіла палёты ў Ізраіль (Тэль-Авіў).