Гібель сапбардыста ў Менску — мужчына зваліўся ў ваду, стукнуўшыся галавой аб мост

28 лютага, Позірк. Некаторыя абставіны гібелі сапбардыста 28 лютага ў Мінску раскрыла прэс-служба Следчага камітэта.

Паводле інфармацыі ведамства, 39-гадовая жанчына і 45-гадовы мужчына, праплываючы на ​​сапбордах па Свіслачы непадалёк ад дома 32а на пр. Незалежнасці, “вырашылі сфатаграфавацца ля вадаспаду”.

“У нейкі момант мужчына страціў раўнавагу, стукнуўся галавой аб бетонную канструкцыю пешаходнага моста і ўпаў у ваду, — гаворыцца ў паведамленні. — Жанчына дастала яго з вады ў несвядомым стане і выклікала хуткую медыцынскую дапамогу. Медыкі, якія прыехалі, канстатавалі яго смерць”.

На месцы здарэння працуе следча-аператыўная група.

Пра гібель сапбардыста раней паведаміла прэс-служба Міністэрства па надзвычайных сітуацыях. Ведамства сярод іншага адзначыла, што медыкі спрабавалі рэанімаваць мужчыну.

Падкрэслівалася, што абодва сапбардысты былі ў гідракасцюмах сухога тыпу, без выратавальных камізэлек.