1 сакавіка, Позірк. За мінулыя дзяжурныя суткі (з 6 гадзін 28 лютага да 6 гадзін 1 сакавіка) ахвярамі агню сталі тры чалавекі, сведчаць аператыўныя даныя Міністэрства па надзвычайных сітуацыях.
Гібель людзей зафіксаваная ў Пухавіцкім раёне (Мінская вобласць), Ельскім (Гомельская) і Докшыцкім (Віцебская).
Паводле звестак МНС, з пачатку года ахвярамі пажараў сталі 193 чалавекі (за аналагічны перыяд 2025-га — 144; +34%). Траўмавана 156 чалавек (67; рост у 2,3 раза).
Усяго на тэрыторыі Беларусі ў 2026 годзе здарыліся 1.673 пажары (1.185; +41,2%).
МНС працягвае карэктаваць даныя смяротнасці ў меншы бок заднім лікам. Напрыклад, 27 лютага ў зводцы значылася, што колькасць загінулых на пажарах сёлета — 191. Праз суткі ведамства паведаміла яшчэ пра трох загінулых, пры гэтым агульная колькасць ахвяр была зніжана да 190.
Раней МНС тлумачыла гэта тым, што часам пасля правядзення судова-медыцынскай экспертызы высвятляецца — смерць наступіла не з-за пажару. Наадварот, як заяўляла ведамства, узгаранне часам можа ўзнікнуць пасля смерці чалавека.
