Сергеенка выказаў спачуванні спікеру парламента Ірана ў сувязі з “гібеллю кіраўніцтва краіны і мірных грамадзян”

1 сакавіка, Позірк. Спачуванні ў сувязі з “гібеллю кіраўніцтва краіны і мірных грамадзян у выніку пачатку сумесных ваенных дзеянняў ЗША і Ізраіля супраць Ірана” выказаў старшыня Палаты прадстаўнікоў Нацыянальнага сходу (ПП НС) Ігар Сергеенка старшыні Сходу ісламскага савета Ірана (аднапалатны парламент) Махамаду-Багеру Галібафу. Пра гэта паведамляецца ў тэлеграм-канале ПП НС.

“Беларускія парламентарыі глыбока ўзрушаныя трагічнай весткай пра шматлікія чалавечыя ахвяры грамадзянскага насельніцтва і разбурэнні ў Іране”, — гаворыцца ў спачуванні.

“Падзяляем пачуццё смутку родных і блізкіх загінулых.  Пацвярджаем нашу прынцыповую пазіцыю супраць любых агрэсіўных дзеянняў, заклікаем не дапусціць далейшай эскалацыі канфлікту і гвалту”, — заявіў Сергеенка.

“У гэты няпросты час” ён выказаў падтрымку “парламенту і народу Ірана”, пажадаўшы “хутчэйшага вырашэння ваеннага канфлікту мірным шляхам і нармалізацыі сітуацыі ў краіне”.

Раніцай 1 сакавіка ўлады Ірана пацвердзілі інфармацыю аб гібелі ў Тэгеране вярхоўнага лідара Алі Хаменеі. Адзначалася, што ён загінуў у сваёй рэзідэнцыі падчас удараў ЗША і Ізраіля 28 лютага. Таксама загінулі дачка, зяць, унук і адна з нявестак аяталы.

У Іране абвешчаная 40-дзённая жалоба.

Раней “Позірк” паведамляў, што Аляксандр Лукашэнка і Міністэрства замежных спраў публічна не рэагуюць на гібель Хаменеі.

Пры гэтым пасля гібелі ў авіякатастрофе ў 2024 годзе прэзідэнта Ірана Эбрахіма Раісі Лукашэнка і МЗС аператыўна выказалі спачуванні. Тагачасны міністр замежных спраў Сяргей Алейнік прысутнічаў на цырымоніі развітання з Раісі ў Тэгеране.

28 лютага МЗС у сувязі з ударамі па Іране асудзіў “любыя ўзброеныя дзеянні, якія вядуць да гібелі грамадзянскага насельніцтва”.

У 2023 годзе Лукашэнка сустракаўся з Хаменеі падчас візіту ў Іран.

Ранкам 28 лютага Ізраіль і Злучаныя Штаты Амерыкі распачалі ваенныя дзеянні ў Іране, раздаліся выбухі ў Тэгеране, Ісфахане і Куме.

Спачатку ўлады ў Тэль-Авіве заявілі пра “прэвентыўны” ўдар, а пазней абвясцілі пра пачатак аперацыі “Ільвіны рык”. Прэм’ер-міністр Ізраіля Біньямін Нетаньяху заявіў, што яго краіна нанясе “цяжкі ўдар па тэрарыстычным рэжыме” і створыць умовы, “якія дазволяць іранскаму народу скінуць з сябе гэты цяжар”.

Міністэрства вайны ЗША абвясціла пра пачатак аперацыі “Эпічная лютасць”. Амерыканскі прэзідэнт Дональд Трамп выступіў са зваротам, у якім назваў яе мэты — знішчэнне ракет, разгром флоту, прадухіленне стварэння ядзернай зброі і свабода для іранскага народа.

“Мы зноў і зноў спрабавалі заключыць пагадненне [па згортванні іранскай ядзернай праграмы], а яны спрабавалі распрацаваць ядзерную зброю”, — сказаў ён.

Трамп заклікаў іранцаў не выходзіць з дамоў: “Калі мы скончым — вазьміце ўладу”.

У сваю чаргу Іран спачатку запусціў ракеты па Ізраілі, а пасля — па амерыканскіх базах у краінах Блізкага Усходу.

Саудаўская Аравія асудзіла “абуральную іранскую агрэсію і грубае парушэнне суверэнітэту” ААЭ, Бахрэйна, Катара, Кувейта і Іарданіі, пацвердзіўшы гатоўнасць “задзейнічаць усе свае магчымасці для аказання ім садзейнічання ва ўсіх захадах, што яны робяць”. Яна таксама папярэдзіла Іран пра “цяжкія наступствы працягу парушэнняў суверэнітэту дзяржаў і прынцыпаў міжнароднага права”.

Ваенныя дзеянні на Блізкім Усходзе пачаліся праз некалькі дзён пасля чарговага раунда перагавораў па іранскай ядзернай праграме. Вашынгтон настойваў на тым, каб Тэгеран закрыў асноўныя ядзерныя аб’екты і перадаў ЗША ўвесь узбагачаны ўран, іранскія ўлады заявілі пра гатоўнасць заключыць пагадненне толькі пры скасаванні санкцый.