Мінулая зіма стала найхаладнейшай за апошнія 15 гадоў

12 сакавіка, Позірк. Мінулая зіма стала найхаладнейшай за апошнія 15 гадоў, сведчыць праведзены “Позіркам“ параўнальны аналіз кліматычных справаздач Белгідрамета.

У зімовым сезоне-2025/26 сярэдняя тэмпература склала 5,7 градуса марозу, што ніжэй за норму (-3,4) на 2,3 градуса.

Халадней было зімой-2010/11 з сярэдняй тэмпературай -6,3 градуса (на 0,8 ніжэй за норму, якая складала тады -5,5).

У сезоне-2024/25 сярэдняя тэмпература склала 2,4 градуса ніжэй за нуль (на 1 градус вышэй за норму), 2023/24 — мінус 1,4 (на 2 вышэй), 2022/23 — мінус 1,6 (на 1,8 вышэй), 2021/22 — мінус 1,8 (на 1,6 вышэй), 2020/2021 — мінус 3,8 (на 0,2 вышэй за норму, тады -4 градуса).

Узімку 2019/20 сярэдняя тэмпература ўпершыню ў гісторыі метэаназіранняў на тэрыторыі Беларусі апынулася станоўчай — плюс 1,5 градуса (на 5,5 вышэй за норму).Самым халодным застаецца зімовы сезон-1939/40 з сярэдняй тэмпературай паветра 10,9 градуса марозу.

Максімальная тэмпература паветра мінулай зімой зарэгістраваная ў Гродне 28 лютага (+13,5), мінімальная — на метэастанцыі “Палеская“ ў Лунінецкім раёне 2 лютага (-31,1).

Снежань быў цяплейшы за норму на 3 градусы (+0,5 супраць -2,5), студзень і люты — халаднейшы адпаведна на 6,2 (-10,3 супраць -4,1) і 3,9 градуса (-7,4 супраць -3,5).

У сярэднім па краіне выпала 109 мм ападкаў (88% кліматычнай нормы; у снежні — 81%, студзені — 120%, лютым — 63%). Самым сухім быў зімовы сезон — 1953/54 (61 мм), самым вільготным — сезон 2023/24 (194 мм).

“Устойлівае снежнае покрыва ўтрымлівалася ўвесь студзень і люты. Тэмпературныя ўмовы і моцныя ападкі спрыялі ўтварэнню снежнага покрыва на большай частцы тэрыторыі краіны з вышынёй, блізкай да максімальнай за шматгадовы перыяд“, — адзначае Белгідрамет.

Максімальная вышыня снежнага покрыва была зафіксаваная ў Верхнядзвінску з 14 па 17 лютага (56 см). У апошніх чыслах лютага толькі ў крайніх паўднёва-заходніх раёнах снег растаў, на астатняй тэрыторыі краіны яго вышыня склала ад 1 см (Івацэвічы) да 46 см (Касцюковічы, Верхнядзвінск).

8 і 9 студзеня адзначаліся моцныя снегапады, на асобных пунктах назіранняў “была зафіксаваная небяспечная з’ява — вельмі моцны снег“ з колькасцю ападкаў да 27 мм (за 12 гадзін і менш). 29 студзеня ў раёне Жыткавічаў назіралася іншая небяспечная з’ява — “моцнае наліпанне мокрага снегу” дыяметрам 88 мм.

Максімальная хуткасць ветру за зімовы сезон адзначаная ў Пружанах 28 снежня (21 м/с).