“Белавія” скасавала яшчэ некалькі рэйсаў у Ізраіль — на наступным тыдні

12 сакавіка, Позірк. Нацыянальная авіякампанія “Белавія” скасавала два рэйсы з Мінска ў Тэль-Авіў і назад — 19 і 22 сакавіка, паведамляе прэс-служба перавозчыка.

Прычынай сталася тое, што авіяцыйныя ўлады Ізраілю падоўжылі да 23 сакавіка закрыццё паветранай прасторы для замежных авіякампаній.

“Пасажыры скасаваных рэйсаў могуць аформіць вяртанне квіткоў па месцы іх набыцця або змяніць дату вылету”, — падкрэсліў беларускі авіяперавозчык.

10 сакавіка паведамлялася, што “Белавія” скасавала два рэйсы з Мінска ў Тэль-Авіў, запланаваных на 12 і 15 сакавіка.

9 сакавіка амбасада Беларусі ў Тэль-Авіве паведаміла пра магчымасць пакінуць Ізраіль рэгулярнымі рэйсамі авіякампаній гэтай краіны. Было заяўлена, што даступныя квіткі на рэйсы авіякампаній El Al, Israir, Arkia і Air Haifa.

Сітуацыя звязаная з баявымі дзеяннямі на Блізкім Усходзе.

28 лютага Ізраіль і ЗША пасля правалу перамоў па ядзернай праграме Тэгерана пачалі ваенныя аперацыі супраць рэжыму аятолаў у Іране. Вярхоўны лідар Алі Хаменеі, які знаходзіўся ва ўладзе з 1989 года, быў забіты на пачатку баявых дзеянняў. Савет экспертаў Ірана абраў новым вярхоўным лідарам яго сына Маджтабу Хаменеі.

Лукашэнка назваў “напад Ізраіля пры падтрымцы ЗША на Іран” “вераломным” і “непрымальным”.