Лукашэнка заявіў, што ўдзельнікі атакі на Іран не дасягнулі сваіх мэт, і раскрытыкаваў Ізраіль
13 сакавіка, Позірк. Удзельнікі атакі на Іран не дасягнулі сваіх мэт. Пра гэта, паводле інфармацыі дзяржСМІ, заявіў Аляксандр Лукашэнка, адказваючы на пытанні свайго пула журналістаў у Дрыбінскім раёне Магілёўскай вобласці.
“Мы займаем акуратную, узважаную пазіцыю. Чалавечую. З Іранам у нас былі добрыя стасункі. Разбамбілі краіну. Старажытная краіна. Вельмі духоўныя людзі, мусульмане. Пачалася вайна. Вы бачылі, я сустракаўся з амбасадарам (Ірана). Мы павінны былі па-чалавечы паступіць. Паступілі”, — заявіў Лукашэнка.
“Мы не ўвязваемся ў гэтую вайну. Я не хачу навязаць сваёй краіне нейкія праблемы. Там амерыканцы з яўрэямі ўжо столькі сабе праблем стварылі…” — дадаў прамоўца.
Пры гэтым віну за згаданыя праблемы палітык усклаў на Ізраіль.
“Іран — гэта велізарная краіна, горныя масівы. Яны шмат прарылі тунэляў і схавалі. Ніводная зброя не дастане. Гэта павінны былі ізраільцяне пралічыць і выкласці [прэзідэнту ЗША Дональду] Трампу: “Вось такая сітуацыя, што будзем рабіць?” Прыехалі, стрэльбу ў рукі, наперад… Што атрымалася? А нічога. Я ведаю, што яны хацелі. Гэта 4–5 пунктаў, пачынаючы ад звяржэння ўлады і заканчваючы бамбёжкамі ядзерных аб’ектаў, адмовай ад ядзернай зброі. Нічога не атрымалася”, — лічыць Лукашэнка.
Паводле яго сцвярджэння, якое прыводзяць дзяржСМІ, “раней Ізраіль разбамбіў сектар Газа”, “дзяцей, усё перамяшалі, там нічога жывога няма”.
Раніцай 28 лютага Ізраіль і Злучаныя Штаты Амерыкі пачалі ваенныя дзеянні ў Іране. Спачатку ўлады ў Тэль-Авіве заявілі пра “прэвентыўны” ўдар, а пазней абвясцілі пра пачатак аперацыі “Львіны рык”. Прэм’ер-міністр Ізраіля Біньямін Нетаньяху заявіў, што яго краіна нанясе “цяжкі ўдар па тэрарыстычным рэжыме” і створыць умовы, “якія дазволяць іранскаму народу скінуць з сябе гэты цяжар”.
Міністэрства вайны ЗША абвясціла пра пачатак аперацыі “Эпічная лютасць”. Амерыканскі прэзідэнт Дональд Трамп выступіў са зваротам, у якім назваў яе мэты — знішчэнне ракет, разгром флоту, прадухіленне стварэння ядзернай зброі і свабода для іранскага народа.
У сваю чаргу Іран спачатку запусціў ракеты і дроны па Ізраілі, а затым — па амерыканскіх базах і іншых аб’ектах у краінах Блізкага Усходу.
Падчас удараў 28 лютага загінуў вярхоўны лідар Ірана Алі Хаменеі, новым лідарам быў абраны яго сын Маджтаба Хаменеі.
7 кастрычніка 2023 года на тэрыторыю Ізраіля з сектара Газа ўварваліся баевікі ваеннага крыла руху ХАМАС. Адначасова з Газы пачаўся інтэнсіўны ракетны абстрэл ізраільскай тэрыторыі. У выніку тэрарыстычнай атакі ў Ізраілі загінула 1,2 тыс. чалавек з 37 краін, у тым ліку трое грамадзян Беларусі; пацярпела 7,3 тыс.
Паводле афіцыйных даных, 7 кастрычніка 2023 года тэрарысты выкралі 251 чалавека. 168 з іх былі вызвалены або выратаваны, целы або парэшткі астатніх былі вернуты ў Ізраіль (парэшткі апошняга — у студзені 2026 года).
На атаку ХАМАС у 2023 годзе Ізраіль адказаў актыўнай ваеннай аперацыяй, у выніку якой было ліквідавана практычна ўсё кіраўніцтва руху. У той жа час маюцца шматлікія ахвяры сярод грамадзянскага насельніцтва. Мінздароўя Газы (структура ХАМАС) заяўляла пра больш як 65 тыс. забітых ад пачатку вайны і каля 166 тыс. параненых. Паводле даных Мінздароўя Палесцінскай аўтаноміі, якія ААН прызнае дакладнымі, больш за 39% забітых у Газе — мужчыны прызыўнога ўзросту, 19% — жанчыны, 32% — непаўналетнія, больш за 8% — пажылыя людзі (ад 60 гадоў і старэйшыя).
15 студзеня 2026 года Трамп абвясціў пра фарміраванне Савета міру, які будзе кіраваць аднаўленнем сектара Газа. Узначаліў орган сам прэзідэнт ЗША.
Лукашэнка падпісаў дакумент пра далучэнне Беларусі да Савета міру 20 студзеня, аднак міністр замежных спраў Максім Рыжанкоў не прыняў удзел у яго інаўгурацыйным пасяджэнні 19 лютага ў Вашынгтоне, паколькі, паводле версіі МЗС, беларуская дэлегацыя не змагла атрымаць амерыканскія візы.
